Rojnamegere Dîlane Oynaş 2016 de bi îdîaya 'endamîya rêxistine' amebî tepiştene û 26ê nîsane de ganî biameyêne veradayene. La seba ke qanûnê 'poşmanîye' yo ke Heyetê Îdare û Çimdarîye yê Zîndanan qebul nêkerdo, înfazê ci ame vêşnayene.  

Oynaşe keyeyê xo rê telefon kerd û vat înfazê ci ame vêşnayene. Oynaşe telefon de wina vat: ''Mi îtîrazê xo de vat ke nasnameyê mi, rûmetê min o. Mi çîyo ke tira poşman biba nêkerd. Ez do têkoşînê xo ra fek vera meda.'' 

Babîyê Dîlane Abdulvahap Oynaşî vera bire nêrazîbîyayîşê xo mojna û vat ke na bire duştê heqanê merdiman a. Babî Oynaşî vat: ''Ma wina pawitêne ke kênaya mi menga nîsane de do bivejîya. La roja veradayîşî de îdareyê zîndanî aye rê vato 'Hema dokument ma rê nêame.' Çîyo bîn zî ci rê nêvato. Kênaya mi vat ke bi her hawayî vera înan hêrişî est ê; nişka ra gardîyanî erzenê koxûşanê înan ser, heqê telefonî yeno binpaykerdene. Gelo hayîya Wezîrîya Edaletî pê ney est a? Înan goreyê zo heyetê çimdarîye ronayê. Kaxizêk danê û vanê 'Şima poşman ê yan nê?' Xora tepişteyî naye qebul nêkenê. Keyeyê tepişteyan ganî wayîrê domananê xo vejîyê.'' 

Babî Oynaşî da zanayene ke kênaya ci seba ke rojnameger a ameye hedefkerdene û vat: ''A çapemenîya azade de ca girewtêne. Çapemenîye zî qedexe kenê. Ganî ma hetê domananê xo de bibê.''