Avûkatanê Rayber Apoyî ra Ozgur Erolî ANFyî rê qisey kerd.

Erolî îfade kerd ke serebûtê ke Îmrali de qewimîyenê bi giranî tesîrê sîyasetê Tirkîya kenê û vat: ''Nê cade benê rojdem, benê sebebê nîqaşê sîyasî û komelkî.''

Erolî vist vîrî ke Wekîlê DEM Partî Omer Ocalanî Rayber Apoyî de pêvînayîş kerdo û vat: ''Tewr peyên 2020 de pêvînayîşê keyeyî amebi kerdene. Birêz Ocalanî ancî çîyê girîngî vatî. Bi taybetî tesbîtê 'Ez wayîrê ê hêzê pratîk û teorîkî ya ke meseleya kurdan çareser bikera' girîng o. Eke şert û mercî bêrê afernayene no mumkîn o. Tesbîto girîng o diyîn zî tesbîtê 'Tecrîd dewam keno' bi. Pêvînayîşê bi keyeyî nêno a mana ke tecrîd qedîyayo. Xora roja pêvînayîşî de ancî bi bahaneya cezaya dîsîplînî qedexeyê pêvînayîşî yê 3 mengan dîyaya.''

Avûkat Erolî vist vîrî ke bira 'heqê hêvîye' 2014 de herê Mehkemeya Heqanê Merdiman a Ewropa (MHME) ra gêrîyabî û îqtîdar 10 serrî yo na bire nêano ca. Erolî vat: ''Dima ke cezaya îdamî wedarîyaya cezaya muebeda girankerde dîyabî Birêz Ocalanî. Rejîmê Îmraliyî wina ferz  keno ke heta ke çew bimiro do tira nêvejîyo. MHME muracatêkê 2000î ser o 2014 de bira heqê hêvîye dabî. Yanî 10 serran ra nata ganî na bire  biameyêne nîqaşkerdene.

Sîstemê Îmraliyî 26 serran ra  nata dewam keno û hinî nêno qebulkerdene. Mîyanê nê şert û mercan de ganî texrîbato fîzîkî û weşî yê tepişteyan bêrê esaskerdene. Ganî sîstemê Îmraliyî hinî bêro wedaritene. Oyo esas no yo ke ganî hinî azadîya fîzîkî ya Birêz Ocalanî bikewa rojdemî. Heqê hêvîye zî heman netîce dano.''