Qezaya Artemêtanî ya Wanî de Makbule Ozera 80 serreya astengdare 9ê gulane de mêrdeyê xo reyde bi îdîaya 'hetkarîya rêxistine' tepişîyaye. Makbule Ozer Zîndanê Wanî de, mêrdeyê ci Hadî Ozer Zîndanê  Asayîşê Berzî  yê Wanî de tepişîyeno.

Makbule Ozer nêweşîyanê xo ra her roje wedarîyena nêweşxane. Ozere roja bîne reyna wedarîyaye nêweşxane û nêeşkayêne payan ser a şora. Makbule Ozer seba ke nêeşkena şora serê ranza, beşê mitbaxî de kewena ra.

Makbule Ozer pê telefonî keyeyê xo de qisey kerd û vat ke dest û lingê aye masayê, nêeşkena nanî biwera û vat: ''Seba ke mi helîyayîşê esteyan est o her roje bena nêweş. Ez hînî nêeşkena payan ser de şora û lazimîya xo bîyara ca. Ez pê kursîyê tekerînî yena berdene. Nêweşîya tansîyon û şekerî zaf zehmetî danê mi. Rixmê ney zî înan raporê 'eşkena zîndan de bimana' da mi. ''

Kênaya Makbule Ozer Naîme Ozer zî pare kerd ke 51 rojan de nêweşîyê dadîya aye zêdîyayî û vat: ''Dadîya mi cara keye de zî nêeşkayêne bi sereyê xo têbigêra. Rixmê nêweşîyanê ci zî raporê 'eşkena zîndan de bimana' dîya aye. Dadîya mi nêweşxaneyan de seke îşkence ancena. Çunke wesayîtê rîngî de rewşa ci bena giran.  Wa no îşkence biqedîyo û dadîya mi bêra veradayene. Ganî tepişteyê nêweşî cade bêrê veradayene. Ma nê zulmê îqtîdarî yê vera kurdan qebul nêkenê. Wa her kes na babete de hîsger bibo.''