Cinî û camêrd Makbule û Hadî Ozer rixmo ke extîyar û nêweş ê 9ê gulane de Wan de ameyî tepiştene û 70 rojî yo binê şertanê zehmetan de zîndan de yê. Kênaya înan Naime Ozer dadî û babîyê ci hinda keye de zî nêeşekayêne miqatê xo bê û waşt ke wa cadê bêrê veradayene.

Naime Ozer vat: ''Dadîya mi bîyayîşê xo ra seba ke qorê ci de problem est o lengena û nika zî zîndan de vera xelêk nêweşîyan mucadele kena. Xora aye verî zî tedawîyê nêweşîyanê sey helîyayîşê esteyî, kolesterol û şikerî  dîbî. Seba ke tede nêweşîye kronîkî est ê ganî dîyetê xo bîyaro ca. Badê zîndanî nêweşîye tansîyon û qelbî zî vejîyayî. Destê dadî û babîyê mi lerzenê. Babîyê mi de nêweşîyê çiman û astimî  est ê.''

Naime Ozer vist vîrî ke dadîya ci zîndan de xora şîye, ginayî erdî ro û dest û sareyê ci şikîya û vat: ''Bado ke dadîya mi zîndan de xora şîye şewêke nêweşxane de mende û dima ra di rojan de rayêke revîr de serûm benê pa. Dadî û babîyê mi yê ke hinda keye de zî nêeşekayêne miqatê xo bê, 70 rojî yo zîndan de yê. Şertê zîndanî zaf zor dano wirdan zî. Rewşa weşîya înan çend şino xirabêre bena. Ganî ê cade bêrê veradayene.''