Ozgur Abul: Ma wayîrê ziwanê xo vejîyê

Înîsîyatîfê Wendekaranê Azadan ra Ozgur Arulî ard ziwan ke qirkerdişo kulturkî dewam keno û îfade kerd ke nê prosesî de ganî ê wayîrê ziwanê kurdkî vejîyê.

Hemvervatoxê Înîsîyatîfê Wendekaranê Azadan Ozgur Abulî ANFyî rê qisey kerd û dîyar kerd ke ronayîşê Komara Tirkîya ra nata polîtîkaya asîmîlasyonî dewam kena û ganî ciwanî vera ney têbigêrê.

Ozgur Abulî da zanayene ke Komara Tirkîya de kurdkî hema zî yena qedexekerdene û vat: ''Çîyo ke faşîzmê AKP-MHPyî bi israrî ser de vindeno kurdan ziwan û kulturê înan ra dûrvistiş o. Waştişê înan seba asîmîlekerdişê kurdan o. Wextê Îtîhat û Terakkî ra nata wina yo. Proses dewam keno û ma vera ney wurzenê payan ser.''

Abulî pare kerd ke dima ke kurdan rê koç ame ferzkerdene, metropolan de merdimî ziwan û kulturî ra dûrî kewtî û no zî beşêkê asîmîlekerdişî yo. Abulî vat: ''Ganî pêro kurdî domananê xo reyde bi kurdkî qisey bikerê û kurdkî bizanê. Oyo ke yeno waştene bêro kerdene astengkerdişê averşîyayîşê herêma ma, çinkerdişê kultur û tarîxê ma yo. Coka ma rê koçberîye yena ferzkerdene.

Eke şima bi tirkî qisey bikerê sey tirkan fikirîyenê, eke şima bi kurdkî qisey bikerê sey kurdan fikirîyenê. Nê prosesî de ke qirkerdişo kulturkî yeno ferzkerdene ganî ciwanê kurdî wayîrê ziwanê xo vejîyê. Nameyê Înîsîyatîfê Wendekaranê Azadan ser o ma venga pêro ciwanan danê ke ziwanê xo bipawê.''