Hemvervatoxê Komîsyonê Têkilîyanê Teberî yê HDPyî Hîşyar Ozsoyî sere de ê Lîbya û Sûrîye polîtîkayê teberî yê Tirkîya ercnayî. Ozsoyî da zanayene ke polîtîkayê teberî yê Tirkîya polîtîkaya 'fetîhî' ya û nê polîtîkayî do bibê sebebê peynîya Tirkîya û AKPyî.

Ozsoyî bale ante ser ke weçînayîşê Amerîka do sere de Lîbya û Sûrîye Rojhelatê Mîyanênî de her çi bivurnê û vat: ''Eke Joe Biden weçînayîşan de ser bikewo seba kurdan rewşe vurîyena. Biden dostê kurdan o û sey Trump sey yew bazirgan nêfikirîyeno.  Beno ke o çax vera Tirkîya tay ambargoyî do bêrê caardene. Biden sey Trumpî do paştî nêdo Erdogan.''

Hîşyar Ozsoyî derheqê meseleya Rojawan û Sûrîye de nê çîyî ardî ziwan: ''Tirkîya têna wazena ke kurdî Serêkanîyê û Efrînî ra şorê. Tirkîya Sûrîye û Iraq de baregehanê leşkerîyan virazena ke nê baregehî netîceya fikrê îtîhatî ya.  Tirkîya û AKP bedelê nê fikrî do bidê. 5 serran ra nata polîtîkaya Tirkîya têna şerê vera kurdan ser o ya. Tirkîya wazena Rojawan û kurdan bifetisna. Coka AKPyî MHPyî reyde îtîfaq kerd. La xoverdayîşê kurdan destûr nêda naye. Bingeyê Komara Tirkîya de zî dişmenîya vera kurdan esta. 

Tirkîya 40 serran ra nata bi bahaneya PKKyî hêrişan kena. La hînî kurdî vakur û başûrî raştîye zanenê. Eke Iraq parçe bibo Başûr de Kurdîstanêko azad do awan bibo. Coka beno ke Tirkîya zî Îran zî hêrişê Herêma Kurdîstanî bikerê û uca îşxal bikerê. ''

Hîşyar Ozsoyî ard ziwan ke ganî kurdkî yewîya xo zixm bikerê û vat: ''Kurdî çend nêzdîyê statuyêkî benê dişmenê kurdan hêriş kenê. Kurdî yewîye ra dûrî yê. Tirkîya nika armanc kena ke kurdê Rojawanî û PKK têvera bêrê. Amerîka zî wazena ke Rojawan û Başûr nêzdîyê yewbînan bibê û Tirkîya zî naye qebul bikera. La ê wazenê Şorişê Rojawanî zî pûç bikerê. Ez vana qey no plan nêeşkîyeno bêro caardene.

Îqtîdar ewro bi dişmenîya vera kurdan nêeşkeno payan ser o bimano. Dewlete 4 serran ra nata hêrişê kurdan kena la ekonomîya ci rijîyaye, dîplomasîya ci çin bîye.''