Wekîlê  Partîya Demokratîke ya Şaran (HDP) yê Amedî Hîşyar Ozsoyî Meclîs de  butçe ser o  qisey kerd û cewab da hêrişanê vera HDPyî.

Ozsoyî bala ante ser ke Wezîrê Karanê Zereyî Suleyman Soyluyî pê HDPyî heqaretî kerdî û vat: ''Hedê çewî çin o ke pê HDPyî heqaretan bikero, ma eşkenê xo bipawê. La çira partîyê bînî yê Meclîsî vera nê heqaretan nêvejîyayî? Beno ke înan zî pê nê heqaretan kêf kerdî.''

Ozsoyî vist vîrî ke Serekê MHPyî Devlet Bahçelîyî nîqaşê 'qefilnayîşê HDPyî' dayî destpêkerdene û vat: ''HDP dikan nîyo ke şima biqefilnê. Rixmo ke îdeolojîya fermî hende serran xîret kerd vengê ma hîş bikerê ma reyna zî tîya de yê. Ma qirkerdiş, vêşnayîşê dewan ra ameyî. HDP bi xo şar o ke îdeolojîya fermîye 97 serran ra nata nêeşkaye biqedîna. Ma venga şima danê ke bêrê ma duelo bikerê. Bêrê ma şorê sindoqanê weçînayîşî, ma vejîyê verê şarî. Ma çewî ra eman nêkenê. Ma do reyna heq û raştîyan bipawê. ''