Endamê Komîsyonê Têkilîyanê Teberî yê Meclîsê HDPyî Hîşyar Ozsoyî Dengizê Sipî û Lîbya de mudaxeleyê Tirkîya ANFyî rê ercna.

Ozsoyî îfade kerd ke meseleya Rojhelatê Dengizê Sipî şerê parekerdişê çimeyanê hîdrpkarbonî yo û vat: ''Mabênê Îsraîl, Yunanîstan û Başûrê Qibrisî de 10 serran ra nata peymanêke esta. Peymane çimeyanê gazê tabîyî ser o ya û seke yeno zanayene Başûrê Qibrisî endamê Yewîya Ewropa yo. Coka Yewîya Ewropa zî mîyanê mesele de ya. Tirkîya zî Vakurê Qibrisî rê heqêk wazena û xîret keno ke nê heqî ra barê xo zî bikera. Tirkîya nika bi geşkerdişê alozîye xîret kena ke dormeyê masa de ronişa. La seke yeno dîyeno rewşe têmîyan a û Tirkîya zêdêr yena îzlokerdene.

Lîbya de hukmatê Serracî adirbirnayîşo bêşert waşt. Labelê verê cû vatêne 'Ma do heta peynî vera terorîstan şer bikerê.' Hem Tirkîya hem zî hukmatê Serracî vera Halîfe Hafterî zemînêk vist dest.Tirkîya armanc kerdêne ke Hafter neçare bibo ke adirbirnayîş îlan bikero û na masa ra zî barê xo bigêra. Tirkîya bi zorî wazena ke masa de ronişa.

Tirkîya eke wina dewam bikera neçare bimana ke şora zemînê pêkerdişî. Nêbo nêeşkena hetê leşkerîyî ra vera Yewîya Ewropa yan zî Fransa rada. Nê hetî ra kapasîteya Tirkîya çin a.''