Hemserekê KCDyî Berdan Ozturkî ke ANFyî rê qisey kerd, bale ante krîzanê Tirkîya ser û vat têna bi newera destpêkerdişê prosesê dîyalogî krîzî eşkenê bêrê çareserkerdene.

Berdan Ozturkî vist vîrî ke tecrîdê Îmraliyî her hetî ra vila beno û nê vatî: “Tecrîd Îmrali ra vila bi resa zîndanan û ûca ra zî resa komelî. Rewşa ekonomî zî rîyê tecrîdî ra xirab a. Polîtîkaya şerî yena domnayene. DEM Partî tim bale ancena na rewşe ser. Yew SÎHA firdana, bi des hezarankesî a menge vêşan manenê. Tirkîya de şar bêkêf o, ameyoxê xo nêvîneno. Qeyûman şaredarîyî binê deynî de verdayî. Bi KHKya merdimî bêkar ameyî verdayene. Nê pêro tecrîdo komelkî yo.

Kurdîstan de vera cinîyan polîtîkê şerê taybetî yenê rayraberdene. Cinayetê vera cinîyan zêdîyene û verê şîdetê serê cinîyan yeno akerdene. No zî pabesteyê tecrîdî yo. Îqtîdarê AKP-MHPyî xeylêk wexto her hetî ra mîyanê krîzî de yo. Îqtîdar seba ke payra bimano, vera kurdan hêrişî zêdînayî. Hetêkî ra polîtîkaya asîmîlasyon û şerê taybetî, hetê bînî ra çar paçeyanê Kurdîstanî de polîtîkaya îmha est a. Nê polîtîkayî tim zirar danê demokrasîyê Tirkîya. Vera nê têkoşîno xurt est o ke do miheqeq ser bikewo.

Îqtîdaro ke ewro bi droneyanê çekdaran Silêmanî de sîvîlan qetil keno, siba eke menfeatê ci biqedîyo vera îdareyê Başûrî zî şer akeno. Ganî ma mîyanê xo de bibê yew. Ma seserrî yo pêrodayîşê estbîyayîşî de yê. Ganî ma hêzê xo bikerê yew ke ser bikewê. Tirkîya ewro her hetî ra mîyanê krîzî de ya. Polîtîkayanê îmha û înkarî feyde nêkerd û ewro ra tepîya zî mekero. Semedê Kurdîstan û Tirkîya proseso tewr rehet prosesê dîyalogî yê bi Birêz Abdullah Ocalanî bi. Bi newera destpêkerdişê prosesê dîyalogî Tirkîya eşkena tengayî ra vejîyo. Xoverdayoxê zîndanan zî semedê nê xeylêk wexto çalakîye de yê. Şiknayîşê tecrîdî û caardişê waştişê xoverdayoxanê zîndanan semedê demokrasi û refahê welatî zaf muhîm o.”