Serekê Partîya Îslamî ya Kurdîstanî (PÎK) Hîkmet Serbilindî qalê raştîya Huda Parî û têkilîya ci ya bi dewleta tirke kerd.

Serbilindî pare kerd ke ganî faktorê Huda Parî hol bêro vatene û da zanayene ke AKP wazeno ke Hîzbullahî ancî tewrê sîstemî bikero. Serbilindî vat: ''Narey Huda Par ronîya. Huda Par projeyêk o ke dewlete vera têkoşînê neteweyî yê şarê kurdî amade kerdo. Çi wext dewleta tirke hêrişê kurdan bikera Huda Par hetêk de vindeno. Huda Parî hêrişê dewleta tirke yê vera Rojawanî sey herişê vera Amerîka mojna, Rojawan de paştî daye cerganê DAÎŞî û qirkerdişê dewleta tirke seke meşrû yê mojnayî.''

Serbilindî dîyar kerd ke dewleta tirke têkoşînê şarê kurdî vera estbîyayîşê xo sey tehlukeyî vîneno û seba ke verê ney bigêra tay rêxistinan vera kurdan wezîfedar kena. Serbilindî vat: ''Sîyasetê kurdan heta nika rayîr nêda tehrîkanê Huda-Parî û ganî nêdo. Yew eleqeyê Huda Parî bi Îslamî çin o. Şarê kurdî mezlûm o la Huda Par dûştê menfaetanê şarê kurdî yo. Huda Par Îslamî zî dejenere keno. 

Huda Parî heta nika vera dewleta îşxalkere qetî tewirêk nêmojna û ê vera PKKyî şer kenê. La PKK têgêrayîşêko neteweyî yo. Huda Par ganî vera dewleta Kemalîste şer bikero. Huda Par Kurdîstan de rolanê tehlukeyînan kay keno. Ganî kurdê misilmanî hol bizanê ke goreyê Îslamî ganî heqê merdimanê bêguneyan û mezlûman bipawîyê. Kurdî hezar û çar se serrî yo misilman ê. La nameyê Îslamî ser o kurdî xapîyenê. Wa kurdê misilmanî vera ney nêrazîbîyayîşê xo bimojno. Huda Par seba ke dişmenîya kurdan bikero ronîyayo.''