Dewleta tirke 40 serrî yo şerê vera PKKyî de sûcê şerî kena û peymananê mîyanneteweyîyan binpay kena. Tewr peyêne dewleta tirke Garê de çekê kîmyewîyî xebitnayî.

Akademîsyenê Fakulteyê Huqûqî yê Zanîngehê Hamburgî Prof. Norman Paechî derheqê babete de Yeni Ozgur Politika rê qisey kerd.

Paechî bale ante peymananê Cenevre û Laheyî ser û vat: ''Edaletê Dîwanî yê Mîyanneteweyî serra 2004î de şuxilnayîş û berardişê çekan ê kîmyewîyan qedexe kerd. La da zanayene ke ê nêeşkenê derheqê xebitnayîşê nê çekan de hukman bidê. Coka dewletan çekanê nukleeran ra fek vera nêda. Dewleta tirke vana ke aye Sûrîye de çekê kîmyewî nêşuxilnayî la ganî na mesele Mehkemeya Cezaya Mîyanneteweyî de bêra cigêrayene. Tirkîya xeylêk reyî hêrişê erdê Iraqî kerd, serdestîya Iraqî binpay kerde. No zî sûcê şerî yo. Dewleta tirke vera PKKyî çekanê kîmyewîyan xebitnena. Semedo ke welatê NATOyî çimeyanê PKKyî qebul nêkenê ganî mehkemeyêka mîyanneteweyî ya xosere biewna na mesele.''

Paechî vist vîrî ke Tirkîya serranê peyênan de warê mîyanneteweyî de xeylêk sûcî kerdî û huqûqo mîyanneteweyî binpay lerd. Paechî vat: ''Tirkîya semedo ke endama NATOyî ya nêna muhakemekerdene û Yewîya Ewropa zî aye fînanse kena. Hêrişê Tirkîya yê vera Garê, Qendîl, Rojawanî, Başûrî pêro sûc ê. Ganî Tirkîya Dîwanê Edaletî yê Mîyanneteweyî yê Laheyî bêra muhakemekerdene. Heta nika qet sûcê dewleta tirke nêame berdene bi mahkemeya mîyanneteweyî. Aseno Amerîka û Yewîya Ewropa ambargoyê ekonomîkî vera Tirkîya do nîyarê ca. Tek rayîrê muhakemekerdişî Mehkemeya Ceza ya Mîyanneteweyî ya.''

Paechî îfade kerd ke dewleta tirke paştîya xo dana şîdetî û vat: ''Erdogan wazeno warê mîyanneteweyî de pozîsyonê Tirkîua xurtêr bikera û sey Osmanîyan  girîngîyêke bivisno destî. La semedo ke o nêeşkeno warê sîyasî û ekonomîkî de wina bikero wazeno pê rayîrê leşkerî nê armancê xo bikero raştikênî.''