Konfederasyonê Yewîyanê Elewîyan ê Ewropa (AABK), Federasyonê Elewî-Bektaşî, Federasyonê Komeleyanê Elewîyan (ADFE), Komeleya Kulturî ya Pîr Sultan Abdalî (PSAKD) û Weqfa Kulturî ya Anatolia ya Haci Bektaşî Velîyî qezaya Bakirkoyî ya Îstanbulî de otêlêke de panelê ''Elewîyî haştîye ser o qisey kenê'' kerd.

Hemserekê Pêroyî yê DEM Partî Tulaye Hatîmogullari û Tuncer Bakirhan zî tede xeylê temsîlkarê partîyan û dezgehan tewrê panelî bîyî.

Tulaye Hatîmogullari panel de qisey kerd û bale ante hêrişanê serê elewîyanê Sûrîye ser. Tulaye vat ke vera nê kerdişan ê do xebatanê xo bizêdînê û bibê vengê pêro elewîyan. 

Tulaye îfade kerd ke meseleya kurdan hinî meseleyêka global a. Tulaye ard ziwan ke Rojawan de bi beşdarîya pêro şar û bawerîyan Îdareyêko Xoser awan bîyo ke ganî vera hêrişan bêro pawitene.

Tulaye vat: ''Îqtîdar seba ke xurtkerdişê rejîmê xo eşkeno muracatê her metodî bikero. La hinî şarê kurdî şarêko polîtîk û rêxistinkerde yo û nêxapîyeno. Haştîyêka bêrûmete û neheqe do hetê kurdan ra nêra qebulkerdene. DEM Partî qebul bikera zî şarê kurdî do qebul nêkero. 

Birêz Abdullah Ocalan pêvînayîşê xo yê peyênî de bi zelalî wina vat: 'Haştîyêke bê muxalefetî nêbena. Muxalefet nêbo no îqtîdar do her çî goreyê xo bikero. Zemînê haştîyêka demokratîke tena seba çareserîya meseleya kurdan ney seba çareserîya meseleya elewîyan zî ganî bivirazîyo. Ez o seba temsîlîya şar û bawerîyanê cîyarengan, demokratîkbîyayîşê welatî, seba caardişê qanûnêkê bingeyî yê demokratîkî xebitîyena.' Mi waşt ke nê qiseyanê girîngan şima de pare bikera.''

Tuncer Bakirhanî zî venga kurdanê elewîyan da ke wayîrê nê prosesî vejîyê.