Paytextê Fransa Paris de bi wesîleya Newroze otêla tarîxî  ya Lutetia de resepsîyonêk ame deyane. Resepsîyonê ke hetê CDK-Fyî ra ame organîzekerdene  fermandaranê YPGyî ra Nurî Mahmut zî tede xeylêk sîyasetmedarê kurdan û fransizan tewrê ci bîyî.

Serekkomaro verên ê Fransa  François Hollandeyî zî mesajêk şawit. Resepsîyon de semedê azadîya Rayberê Şarê Kurdî Abdullah Ocalanî ame vengdayene. Hemseraknê CDK-Fyî Xane Akdogan û Şahîn Polîtî qiseykerdişê akerdî kerd û bale ante muhîmîya Newroze ser.

Dima Wezîrê Perwerdeyî yê Fransa Jean Michel Blanguerî qisey kerd. Blanguerî roşanê şarê kurdî pîroz kerd û bale ante muhîmîya Şorişê Rojawanî ser. Blanguerî vat Rojawan rayîrê têkoşînî mojneno înan û semedê paştdayîşê Rojawanî veng da.

Fermandaranê YPGyî Nurî Mahmudî zî bale ante polîtîkayanê herême yê vera Rojawanî ser û nê vatî: ''Hem Tirkîya hem zî Îran seba ke Rojawan û Sûrîye de kaos xorî bibo çîyo ke destê înan ra yeno kenê.  Ê eynî wextî de polîtîkayanê vera rojawanî rayra benê. Ma zî herême sîyasetî rayîrê hîrêyinî teqîp kenê  ke tede rixmê heme cîyatîye îmkanê pîyaciwîyayîşî est o. Sîyasetê ma goreyê sîyasetê rojanî yo zî. Coka ganî ma vera nê hêzanê kanperestan paştdayîşî û têkoşînê hemparî xurtêr bikerê.''

Resepsîyono ke tede muzîko kurdkî ame goştarîkerdene de mesjaê Serekkomarê verênî yê Fransa François Hollandeyî ame wendene. Hollandeyî vat: ''Ez zana ke şarê kurdî gama ke Newroze pîroz keno têna serra newî pîroz nêkeno, her çî ya ver zextî red keno û reyna waştişê xo yê azadîye ano ziwan. Kurdê ke erjanê xo yê esasîyan pawinê bi cesaretê xo îlham danê ma. Dostê erjîyayeyî ez hêvî kena na serra sima serranê bînan ra zafêr rind û bihuzur bo. Naye hole bizanê ke ewro zerrîya xeylêk kesan şida dir a.''