Bado ke Hemvervatoxanê Partîya Çep a Keske Çîgdeme Kiliçgun Uçar û Îbrahîm Akinî 1ê teşrîna verêne de derheqê meseleya kurdan û rolê Rayberê Şarê Kurdî Abdullah Ocalanî de meclîs de eşkerayîya çapemenîye kerde, Uçare sey hedef ameye mojnayene. Heyetê Merkezê Rayberişî yê Partîya Çep a Keske derheqê babete de eşkerayîye daye û nê vatî:

“Akerdişê meclîsî de vervatoxanê ma û grûba ma ya meclîsî eşkerayîya çapemenîye daye. Na eşkerayîye hetê îqtîdar û hetanê ke huqûq nas nêkenê ra sey hedefî ameyî ramojnayene û bitaybetî Vervatoxa ma Çîgdeme Kiliçgun Uçar gerîyaye hedefê hêrişan. Ma sere de nê vajê; partîya ma do tradîsyonê xo yê sîyasîyî û perspektîfanê çareserîye bidomno û heta ke haştîye bêro na herre têkoşînî bidomno.

Eşkerayîya ke ma 1ê teşrîna verêne de ameye dayene, vengdayîşê haştîye bi. Eşkerayîye de ame vengdayene wa tecrîd bêro wedaritene ke meseleya kurdan û meseleyê komelkî bêrê çareserkerdene. Wezîfeyê meclîs û sîaysetî o yo ke verê mergan bîgêro ke rîyê nê meseleyan ra qewimîyenê. Vateyê Hemvervatoxa ma Çîgdeme Kiliçgun Uçar ke yenê bedilnayene û xelat yenê mojnayene, heqîqetê nê welatî îfade kenê. Ma reyna bi vengê berzêr îfade kenê ke:  Îqtîdar wazeno ke wa meseleya kurdan mêro çareserkerdene û şer bibo. Çi heyf ke bedelê nê tercîhê îqtîdarî şar anceno. Qet çew nêeşkeno na raştîye binimno. Çîyo ke sey qederî nê şarî rê yeno ferzkerdene, ma çirey qebul nêkenê. 

Têna hetê muxalîfî nê heme komel yeno tehdîtkerdene. Tehdîtê ke meclîs de vera nasnameyê cinîyan û fikîryayîşê azadî bênê, ma sey partîye înan nas nêkenê. Ma derdê lînçkerdoxan zanê. Ê vatişê çareserî û îxtîmalê ci ra tersenê. Îqtîdar wazeno bi domnayîşê şerî, mergî, vînîbîyayîşanê madî û manevîyan payra bimano. Ma nê red kenê! Ma do vera tehdîtê ke vera partîye, varvetoxe û  îradeyê şarê ma bênê, bi rayîrê huqûq û sîyasetî hesa bipersê. Ma do tim semedê çareserî û haştîye têkoşînî bidomnê.”