Yewînanê Iraqî yê rejîmê Saddam Huseyînî 16ê adara 1988î de pê gazê kîmyewî şaristanê Helebçe yê Başûrê Kurdîstanî de tewr tay 5 hezar kurdî qetil kerdî. Rejîmî seba qirkerdişê kurdan xeylêk operasyonê bi nameyê 'Al Anfal'î kerdî. Netîce de cinî û domanî zî tede 182 hezar kurdî ameyî qetilkerdene, mîlyonêk kurdî waranê xo ra bîyî.

Partîya Çepe ya Almanya pê vernîyazêk mesele berde Meclîsê Almanya. Wekîla Partîya Çepe Hêlîne Evrîm Sommer vernîyaz de pare kerd ke rolê Almanya zî nê qirkerdişî de esto. Vernîyaz destpêkê adare de do bêro nîqaşkerdene.

Vernîyaz de yeno waştene ke operasyonê Enfalî bi hawayêkê fermî sey qirkerdiş bişinasîyê, seba mexdûranê qirkerdişî tedbîrî bêrê girewtene, nê kesî pê hetkarîya madî rehabîlîtasyon bivînê û Almanya şîrketanê ke çekê kîmyewî dayê Iraqî hukm bikera, nê şîrketî tazmînat bidê mexdûr keyeyanê qurbanan.

Sommere vat: ''Ganî nê operasyonî sey qirkerdiş bişinasîyê û Almanya şîrketanê sûcdaran cibigêra. Seba mexdûran wa edalet bêro caardene.''

Heta nika Swêd, Norweç, Koreya Başûre û Îngilîstanî Enfal sey qirkerdiş qebul kerd.