Partîyanê muxalîfan ê Almanya ra Partîya Çepe derheqê dewaya qefilnayîşî ya vera HDPyî û betalkerdişê wekîlîya Omer Faruk Gergerlîogluyî de eşkerayîyêka çepemenîye daye. Endamanê Partîya Çepe ra Jorg Schindler, wekîl Gokay Akbulut û wekîla verêne ya HDPyî sîbele Yîgîtalp tewrê eşkerayîye bîyî.

Verî Sîbele Yîgîtalp pare kerd ke verî derheqê weşîya Abdullah Ocalanî de tay îdîayî ameyî pêşkêşkerdene, dima wekilîya Gergerlîogluyî ameye betalkerdene û tewr peynî de zî vera HDPyî na dewa ameye akerdene. Sîbele Yîgîtalp da zanayene ke no mojneno ke hêrişêko pîl dîya destpêkerdene. Sîbele waşt Almanya wa vera nê çîyan hînî tewirê xo bimojna.

Gokay Akbulutî zî bale ante ser ke hêrişê vera HDPyî nê wextanê peyênan de zêdîyayî û ganî sere de Almanya pêro welatê Ewropa paştî bidê HDPyî.

Îdarekarê Partîya Çepe Jorg Schindlerî zî ard ziwan ke Almanya eşkena vera nê kerdişan zaf çîyan bikera û vat: ''Almanya eşkera rotişê çekan vindarna, komê AKP-MHPyî qedexe bikerê, xebatê lobî qedexe bikerê. Almanya tim vana 'ma qerqilîyenê' û reyna hemkarîya rejîmê Erdoganî kena.''