Serekanê Partîyan ê Sîyasîyan û Endamanê Parlamentoya Ewropa derheqê dewaya Kobanê de ke 26ê nîsane de do dest pêbikera û parçeyêkê operasyonanê vera HDPyî ya venga pêro hetan da ke paştî bidê HDPyî.
Endamanê Koordînasyonê Grûba Dostanîya bi Kurdan ê Parlamentoya Ewropa PE) François Alfonsi (Wekîlê Partîya Keskan), Nikolaj Villumsen (Çepo Yewbîyaye yê Ewropa/Wekîlê Çepê Keskan ê Danîmarka) û lîderanê partîyan ê sîyasîyan ê Ewropa Heinz Bierbaum (Serekê Partîya Çepe ya Ewropa), Evelyne Huytebroeck û Thomas Waitz (Hemserekê Partîya Keskan a Ewropa), Lorena Lopez de Lacalle (Sereka Îtîfaqê Azadîyan ê Ewropa) û Sergei Stanishevî (Serekê Partîya Sosyalîstan a Ewropa-PES) eşkerayîyêka hempare daye û bale ante dewaya Kobanê ser ke tede 108 sîyasetmedarî yenê muhakemekerdene.
Eşkerayîye de ame parekerdene ke pê tedayanê sîstematîkan yeno waştene ke HDP bêro çinkerdene û xoverdayîşê Kobanê bêro krîmînalîzekerdene.
Eşkerayîye de ame vîrvistene ke serdozgerîyê tirkan wazenê îdarekar û weçînayîyeyê HDPyî zî tede dewa da tewr tay 100 kesî bêrê tepiştene û çalakîyê seba Kobanê sey 'paştdayîşê terorîzmî' bêrê mojnayene. Lîderan da zanayene ke wextê xoverdayîşê vera hêrişanê DAÎŞî de dewleta tirke paştî dayêne nê cerganê DAÎŞî û HDPyî seba serebûtanê ê çaxî vernîyazê persî da la AKPyî vernîyaz red kerd. Lîderan ard ziwan ke coka nê weçînayeyî ganî nêrê muhakemekerdene.
Lîderan vat: ''Ma paştî danê HDPyo ke maruzê hêrişan ê sîstematîkan beno û paştdayîşê seba xoverdayîşê Kobanê qetî nêro krîmînalîzekerdene.''
Lîderan eşkerayîye de vateyê 'Çîyo ke Erdogan qehr keno qetilkerdişê hemwelatîyanê ma nê Kobanê de binkewtişê DAÎŞî yo.' yê Selahattîn Demîrtaşî pare kerd.
Lîderan venga pêro merdiman da ke kesê ke eşkenê 26ê nîsane de wa şorê mehkeme la yê ke nêeşkenê şorê wa sere de medyaya dîjîtale de wa her ca de seba paştdayîşê HDPyî çalakîyan bikerê. Çarçewa vengdayîşî de medyaya dîjîtale de pê hashtaganê '#SolidarityWithHDP' û '#DefendKobani' vilakerdişî do bêrê kerdene.
Temsîlkarîya HDPyî ya Ewropa zî venga pêro sîyasetmedaran da ke wa paştî bidê çalakîyanê seba paştdayîşê HDPyî. Temsîlkarîye vat: ''Ma zanenê ke vera xîretê krîmînalîzekerdişê xoverdayîşê Kobanê û HDPyî yê AKPyî merdimîye seke wextê xoverdayîşê Kobanê de kerd ewro zî hetê têkoşîneranê azadîye û demokrasî de ca bigêrê.''
