Avûkate Paula Martin Ponz derheqê pêvînayîşê bi Rayber Apoyî de vat: ''Hayîya Tirkîya bi hêzê Abdullah Ocalanî est a û Tirkîya neçare mende ke ey de pêvînayîş bikera.'' Paula waşt ke tepişteyê sîyasîyî û Rayber Apo wa azad bibê.
Aktîvîsta heqanê merdiman, femînîste û Avûkate Paula Martin Ponz derheqê pêvînayîşanê bi Rayber Apoyî de ajansê ma rê qisey kerd.
Paula vist vîrî ke 2023 de înan sey heyetêkê mîyanneteweyîyî waştibi şorê Îmraliyî la destûr nêdîyabi înan. Paula ard ziwan ke îşkenceyê vera Rayber Apoyî tewirêkê vera şarê kurdî yo û vat: ''No îşkence binpaykerdişê heqanê merdiman o. Oyo ke Îmrali de qewimîyeno îşkence yo. Heyetê ma armanc kerdêne ke tedaya Tirkîya bikero ke goreyê krîteranê heqanê merdiman têbigêra. Rewşa Îmraliyî tena Tirkîya ney pêro dewletanê bînan eleqedar kena.''
Paula Martin Ponz dîyar kerd ke pêvînayîşan de ame dîyene ke fikrê Rayber Apoyî çiqas girîng ê û vat: ''Tirkîya fam kerd ke hetê komelkî û sîyasî ra neçare ya ke Ocalan de pêvînayîşan bikera. Ancî eşkera bi ke Ocalan tena seba kurdan û Rojawanî ney seba şaranê bindestan kesêko girîng o.
Tecrid nêqedîyayo. La hayîya Tirkîya bi hêzê Abdullah Ocalanî est a û Tirkîya neçare mende ke ey de pêvînayîş bikera. Ocalan lîderêk o û bi hawayêkê kolektîfî têgêreno. Tarîxê nê çareserîyan ercneno û seba ameyoxî zî perspektîfêkê girîngî pêşkêş keno. Ey qewimîyayîşê Rojhelatê Mîyanênî ercnayî û çareserîyî pêşkêş kerdî.
Ganî Abdullah Ocalan û tepişteyê sîyasîyî heqê hêvîye ra îstîfade bikerê. Fikrê Abdullah Ocalanî tena seba Rojhelatê Mîyanênî, seba dinya eşkenê haştîye bîyarê. Ez wazena ke o û pêro tepişteyê sîyasîyî azad bibê.''
