Wekîlê HDPyî yê Adana Kemal Pekozî derheqê hêrişanê nîjadperestan ê vera kurdan û nê hêrişan de rolê îqtîdarî de qisey kerd.

Pekozî îfade kerd ke mabênê hêrişanê nîjadperestan ê Tirkîya û polîtîkaya îşxalî ya teberî ya îqtîdarî de yew eleqe esto. 

Pekozî vat:''Tirkîya serra 2017î de verê referandumê Başûrê Kurdîstanî girewt. Dima Sûrîye de hêverî waşt PYD vera Esadî şer bikero. La dima ke PYDyî menfaatê kurdan pawitî îqtîdarî PYD sey terorîst îlan kerd. rojawan ame îşxalkerdene, Rojawan de nameyê cayan vurîyayî, perwerdeyê tirkî dîyeno. Tirkîya DAÎŞ qebul kena la statuyê kurdan qebul nêkena. AKP-MHP her hetî ra bi taybetî hetê ekonomîkî ra teng bîyê. Seba ke serê înan bigêro şîdet, bombarduman keno.''

Pekozî bale ante Projeyê Anatolîaya Başûrrojhelate ser û da zanayene ke bi nê projeyî qestî ra kurdî yenê mexdûrkerdene û asîmîlekerdene. 

Pekozî eşkera kerd ke dewlete hêrişanê nîjadperestan ê vera kurdan de polîtîkaya bêcezaverdayîşî ana ca û vat: ''Serebûtê Kemal Korkutî de dewlete vat serê ey de bomba estbi. Serebûtê Sakarya de walîtîye vat 'hêrişo krîmînal o.' Nika zî walîtîya Afyonî heman çi vat. Wezîrê Karanê Zereyî tacîz û tecawuzkerî pawitî. Seba serebûtê leşker Dogan Çetînî zî Wezîrê Pawitişî vat ke tehqîqat dewam keno. Hêrişê nîjadperestî netîceya nê bêcezaverdayîşî ya. Merdimî zî naye ra hêz gênê vanê dewlete peyê înan de ya û hêrişê kurdan kenê. Dewlete tîya ra asteng kena ke Çîn û Japonya de dersê kurdkî bêro dayene. Qeyûmî hêverî dezgehê kurdkî û cinîyan qefilnayî. Nê mîsalê dişmenîya vera kurdan ê. Nîjadperestê şovenîstî naye vînenê û hêriş kenê.''

Pekozî, mesuldarîyê rayaumûmîye û muxalefetî wina vistî vîrî: ''Ganî her kes vera polîtîkayanê şerî vejîyo. Wexto ke Amanos de şewat vejîyeno bi desan helîkopterî erşawîyenê la Cûdî de nêno destûrdayene ke şar şewatî rê mudaxele bikero. 

Ganî her kes vera texrîbatê goran, qirkerdişan vengê xo vejo.Ma îqtîdarî ra çîyêk nêpawenê. Wa her kes bêro xo ser, verê xo bido kurdan û pîya têkoşîn bikero. Nêbo do zaf poşman bibo.''