Endama Heyetê Rayberdişî yê Merkezî (MYK) yê DEM Partî û Hetkara Hemserekanê Komîsyonê Kede Sevtape Akdag derheqê Kampanyaya Nan û Edaletî de ANFyî rê qisey kerd.

Sevtape Akdag dîyar kerd ke Kampanyaya Nan û Edaletî 19ê temmuze de dîyabî destpêkerdene û do bivurîya xeta têkoşînî. Sevtape vat: ''Ma waxenê bernameyêkê têkoşînî yê winayênî awan bikerê ke şaristananê cîyayan de şarî reyde kom bibê, waştiş û meseleyanê înan goşdarî bikerê, pêşnîyazanê çareserîye bikerê.''

Sevtape ard ziwan ke babeta meaşê asgarîyî babetanê tewr serekeyan ra yew o û vat: ''Netîceya polîtîkayanê şerî yê 10 serran de xizanîyêka girane virazîyaya. Çele de meaşo asgarî sey 17 hezar ameyo dîyarkerdene. La enflasyonî ra no reqam bîyo 13 hezar lîra. Heta peynîya serre do çendek bibo? Nê mabênî de vayê her çîyî zêdîyenê. Polîtîkayê ekonomî her kesî vêşan verdenê.''

Sevtape bale ante polîtîkayanê şerî yê îqtîdarî ser û vat: ''Polîtîkayê şerî dewam kenê. Herême de her ca de qereqolî awan bîyê, operasyonê teberê sînorî dewam kenê û nînan rê pereyê şarî yeno xerckerdene. Pereyo ke şerî rê yeno xerckerdene oyo ke nanî rê nêno xerckerdene. Coka ma do bi sernameyê Nan û Edaletî kom bibê.  Seba vurîyayîşê demokratîkî û awankerdişê welatêkî hewceyê ma bi vurîyayîşî est o. Kampanyaya ma ya Nan û Edaletî zî seba ney o ke ma meseleyan cayê ci de bivînê.''