Hemserekê Pêroyî yê HDPyî yo verên Selahattin Demirtaştî badê pêvînayîşê bi Serekê Pêroyî yê CHPyî Ozgur Ozelî hesabê xo yê medyaya sanale de eşkerayîye daye.

Demîrtaşî semedê zîyaretî Ozelî rê spas kerd û vat înan pêvînayîş de derheqê rojdemê Tirkîya de muneqeşe kerd. Demîrtaşî vat waştişê edalet, haştîye û yewbîyayîşî yê komelî vejîya vernî.

Demîrtaşî ard ziwan ke Tirkîya de bi serran o huqûq yeno binpaykerdene û nê vatî: ''Eke yeno waştene ke prosesê 'nermbîyayîş û nomalbîyayîşî' yo ke Serekkomar Recep Tayyip Erdogan qala ci keno, pratîk de bêro caardene, ganî hêver huqûq bêro caardene. Heta ke wina mebo kanalê sîyasetî anêbenê û normalbîyayîş zî nêbeno.''

Demîrtaşî vat înan pêvînayîş de feqîrîye ra heta meseleya kurdan, heqanê xoza ra heta meseleyanê cinîyan, domanan û ciwanan xeylêk babetî girewtî dest. Demîrtaşî ard ziwan ke înan reyna derheqê tepişteyanê dewayanê Kobanê û Gezî zî de qisey kerd ke ganî ê serbest bêrê veradayene.

Demîrtaşî ard ziwan ke ê do sîyasetê demokratîkî cameverdê û vat bi rayîrê avûkatanê ci do detayê pêvînayîşî biresê Merkezê Pêroyî yê DEM Partî.