Zîndanê Qefilnayeyî yê Cinîyan ê Bakirkoyî de tehlîyeya 10 tepişteyan hetê Heyetê Çimdarî û Îdareyî yê Zîdanî ra hendê serrêke peyde ameye eştene.

Înîsîyatîfê Patşdayîşê Tepişteyan verê Zîndanê Bakirkoyî de no qerar protesto kerd. Endamê MATUHAY-DERî, îdarekarê DEM Partî yê Îstanbulî û qezayanê ci, merdimê tepişteyan û temsîlkarê xeylê dezgehanê komelê sîvîlî tewrê çalakîye bîyî. Çalakîye de sloanê sey ''Wa zîndanî birijîyê, tepişteyan rê azadîye'' û " Jin jiyan azadî" ameyî vatene.

Hemsereka MATUHAY-DERî Dileke Sonmez Demir bale ante zextanê zîndanan ser û vat: ''Zîndanan de rixmê temambîyayîşê ceza bi bahaneyanê cîya cîyayan tepişteyî nînê veradayene. Zîndanê Bakirkoyî de peydeeştişê tehlîye hinî bi hewayêkê sîstematîkî yeno kerdene. Nika zî bi hewayêkê keyfî tehlîyeya Dîleke Oz, Dîlane Kutlu, Eyleme Ozer, Elife Yaş, Mekine Sonuk, Dîlane Turan, Turkan Karadaşli, Niel Genç, Sureyya Bulut, Zelale Kiliç ameye peydeeştene. Par zî eynî zîndan de bîlasebeb xeylê tehlîyeyî ameyî peydeeştene.''

Dayîkanê Haştîye ra Sabîha Bozan zî vat: ''Ma nê çirey qebul nêkenê. Ewro zîndanan de dejo pîl est o. Ma tîya ra veng danê Wezîre Edaletî, Wezîrê Karanê Zereyî û Serekkomarî nê sûcî cade biqedînê.Hinî bes o.''