Peymana Leşkerî ya mabênê Anqara-Bexdadî ya bi hemkarîya PDKyî 15ê tebaxe de amebî îmzakerdene, tira dima hêrişê dewleta tirke yê vera sivîlan zêdîyayî. Hêrişanê 15ê tebaxe ra dima tewr tay 9 sivîlî ameyî qetilkerdene, 9 sivîlî zî birîndar bîyî.

Hêrişê Tirkîya yê vera sivîlan warê mîyanneteweyî û neteweyîyî de benê sebebê nêrazîbîyayîşan. La selahîyetdarê Iraq û Herêma Kurdîstanî bêveng ê.

23yê tebaxe ra nata hêrişanê dewleta tirke de rojnamegerî Gulîstane Tara û Hêro Bahadîn bi droneyanê çekdaran ameyî qetilkerdene.

Silêmanî û Dihok de hêrişan de cinî û domanî zî tede xeylêk sivîlan dinyaya xo bedilnaye.

5ê êlule de Şarbajêr de hêriş de 3 sivîlî zereyê wesayîtêkî de ameyî qetilkerdene.

10ê êlule de Mexmûr de Kampa Multecîyan a Şehîd Rûstem Cûdîyî ya Mexmûrî de 3 cinîyî birîndar bîyî.

Serra 2023yî ra nata zî hêrişan de tewr tay 20 kesî ameyî kiştene, xeylêk kesî zî birîndar bîyî. Hetê bînî ra xeylêk baregehê neweyî ameyî awankerdene, dewijan rê koçberîye ameye ferzkerdene, bax û baxçeyê dewijan ameyî xerakerdene û binawanîye dîyaye bombayan ver.