Komeleya Kultur, Yewîye, Paştdayîş û Hetkarîye yê bi Keyeyanê ke Dergûşê Medenîyetan de Merdimê Xo Vînî Kerdî (MEBYA-DER) çarçewa aktîvîteyanê 25ê Teşrîna Peyêne Roja Têkoşînê Vera Şîdetê Serê Cinîyan de waşt ke dewa Sisê ya qezaya Licê ya Amedî de goristan zîyaret bikera. Wekîla HDPyî Remzîye Tosun zî tewrê heyetê zîyaretî de bîye.

La polîsan û leşkeranê tirkan dormeyê goristanî û dewe girewt, dekewtişê komele asteng kerd. Polîsan muxabîra Jinnewsî Derya Ren asteng kerde, pê kayişê makînaya kamera milê ci teng kerd û dest na makînaya ci ser.

Înan dima zî hêrişê muxabîra Ajansê Mezopotamya Eyleme Akdag kerd, a tan daye û dest na makînaya ci ser. Leşker û polîsan Akdage û Rene rê gefê destbendkerdişî wend. Remzîye Tosun vera înan nêrazîbîyayîşê xo mojna û malzemeyê rojnamegeran apey girewtî.

Dadîyêke vera nê kerdişan nêrazîbîyayîşê xo mojna û vat: ''Ma dadî yê, cigêrê ma vêşenê.'' Polîsêkî zî naye ser o dadîye rê heqaret kerd.

Rixmê astengkerdişî zî MEBYA-DERî rayîrê dewa Fîsî de eşkerayîye daye. Endama MEBYA-DERî Razîye Işiktaş tîya de vat: ''Ma waşt serê goranê xo de fatîha biwanê la înan nêverda. No senî edalet o? Ma na rewşe qebul nêkenê.''