Rêxistinanê HDPyî yê qezayanê Îstanbûlî seba ke bale biancê grevê vêşanîye yo ke zîndanan de 55 rojî yo vera tecrîdî û binpaykerdişê heqanê înan yeno rayraberdene pankartî daliqnayî. Polîsan eşt nê cayan ser û  dest na pankatan ser.

Goreyê zanayîşanê ke ameyî girewtene Bagcilar, Umraniye, Sancaktepe, Esenyurt, Beylikduzu, Sultangazi, Beyoglu, Kagithane, Gaziosmanpaşa, Esenler, Uskudar, Kartal, Maltepe, Gungoren û Şişli de banê HDPyî ameyî sereştene. Hemserekê nê cayan zî semedê îfadedayîşî ameyî berdene mudirîyanê asayîşî yê qezayan.

Hemserekê HDPyî yê Îstanbulî Erdal Avciyî vera sereştişan hêrisê xo ard ziwan. Avciyî ard ziwan ke  sey heme partîyanê sîyasîyan heqê înan zî esto ke banê xo de pankarte bidaliqnê û vat vera partîyê înan zext yeno kerdene ke ê nayî qebul nêkenê. Avciyî vist vîrî ke ê amadekarîye kenê ke siba Kadikoy de vera tecrîdî eşkerayîyêke bide û vat baldaro ke no sereştiş verê eşkerayîye ame kerdene. Avciyî vat ê do siba eşkerayîya xo bidê û heme banê xo de pankartanê xo zî bidaliqnê.