Vizêr şan dest nîyabi wekilîyê Hemsereka KCDy û wekîla HDPyî ya Colemêrgî Leyle Guven, Wekîlê HDPyî yê Amedî Musa Farisogullari û Wekîlê CHPyî yê Îstanbulî Enîs Berberoglu ser. Wekîlanê HDPyî seba ke na darbeya îqtîdarê AKP-MHPyî protesto bikerê Meclîsê Grûba HDPyî de eşkerayîyêke kerde.

Serewekîlanê Grûba HDPyî zî tede wekîlan eşkrayîye ra dima Kizilayî ra ver bi Parka Guvenî dest pê rayraşîyayîşî kerd. Wekîlanê HDPyî dowîzê bi nuşteyê ''Darbe esta'' kiriştî û sloganê ''Darbeker AKP'' vat. 

Polîsan Parka Guvenî de bendî nayî ro û bi bahaneya ''Destûrê walîtîye çin o'' wekîlê HDPyî asteng kerdî. Polîsan dima hêrişê wekîlan kerd, çaketê Wekîlê Adana Ridvan Turanî û verçimê Wekîl Kemal Bulbulî şikna.

Wekîlê HDPyî yê Riha Omer Ocalan wina nêrazîbîyayîşê xo mojna: ''Ti provakator î, polîsê darbe yî.'' Wekîlê HDPyî yê Îzmîrî Murat Çepnîyî zî vat: ''Polîsan hêrişê embazanê ma yê wekîlan kerd. Embazê ma vera darbe vejîyayî meydan. Cergî hêrişê înan kenê.''

Wekîlanê HDPyî nêzdîyê Parka Guvenî de Bulvarê Ataturkî de eşkerayîyêke kerde.

Serekwekîlê Grûba HDPyî Saruhan Oluçî vat: ''Ewro nê hêrişî zî mojna ke darbe esta. Îqtîdar vera huqûq, adelet, sîyaset darbe keno. Îqtîdarî wekîlîya raqîbanê xo batal kerde. Pê hukmkerdişî vera raqîbanê xo têkoşîn keno. No îqtîdar armanc keno ke estbîyayîşê îqtîdarê xo bido dewamkerdene, sewbîna yew armancê ci çin o. No îqtîdar îqtîdarê şerî yo. 

Ma sey HDP tim payan ser o vinderê. Ma do vera zulmê nê îqtîdarî sereyê xo nêarê wa û çok nêşorê erdî. Weçinîtoxê ma sere de şarê kurdî heta nika sereyê xo nêard wa û do nêaro war. Ma do dewam bikerê ke qerardarîya xo bimojnê.''

Wekîlî eşkerayîye ra dima pê sloganê ''Darbeker AKP'' reyna ver bi Meclîsî rayîrî ra şinê.