Kesê ke pê Qerarnameyê Hukmê Qanûnî (KHK) ameyî îxrackerdene Salonê Yilmaz Guney ê Enqere de vizêr waşt aktîvîteyêk bike la aktîvîte hetê walîtîye ra ame qedexekerdene. Zîyareto ke mexdûranê KHK'yî do merkezanê pêroyîyan ê HDP'yî û Partîya Şayîye (SP) rê bikerdêne zî ame astengkerdene. Polîsan kuçeyê Merkezê Pêroyî yê HDP'yî ra  şîyayîş û ameyîşî qedexe kerdî. Şar dimayê GBT'yî apey yeno erşawitene.

Wekîlanê HDP'yî Omer Faruk Gergerlîoglu û Habîp Eksîk padayîşê ver ê merkezo pêroyî rê reaksîyon da. 2 kesî ke înan reaksîyon da polîsan ameyî destbendkerdene. Polîsanê Çewîkî wekîlî û mexdûrê KHK'yî tan dayî û darb kerdî. Wekîlê HDP'yî Eksîkî vat: "Şima nêeşkenê verê partîya mi pabidê. Kerdişê şima bêhuqûqî yo." Mexdûrê KHK'yî yê ke şaristananê bînan ra ameyî dekewtişê Enqera û Eryamanî de ameyî apey erşawitene. Seba ke mexdûranê KHK'yî ke Stenbolî ra ameyî waşt rayraşîyayîşêk bikê, polîsan herişê bi gazî verba înan kerd. Serebût de zafê kesî birîndar bîyî.