Dima ke medyaya komelkî de derheqê weşîya Rayberê Şarê Kurdî Abdullah Ocalanî de tay îdîayî ameyî parekerdene rojdemo verên ê kurdan bi rewşa Ocalanî. Çunke 27ê nîsana 2020î ra nata Abdullah Ocalanî ra xeberêke nêna girewtene. Pisporê sîyaset û huqûqê mîyanneteweyî Prof. Norman Paechî bale ante girîngîya mesele ser.

Paechî îfade kerd ke ganî cade Îmrali de heyetêk Rayberê Şarê Kurdî reyde pêvînayîşê rî bi rî bikero û venga Yewîya Ewropa û Konseya Ewropa da ke rejîmê Erdoganî hîşyar bikerê.

Prof. Norman Paechî vist vîrî ke Tirkîya biranê Mehkemeya Heqanê Merdiman a Ewropa nêana ca û vat: ''Abdullah Ocalan Kurdîstan û Tirkîya de û pêro herême de kesayetêko girîng o. O eşkeno mesele û krîzan çareser bikero. Weşî û asayîşê ey babetêka girîng a. Eke çîyêk bêro sereyê ci herême de felaket qewimîyeno.''

Prof. Norman Paecho ke dewaya Kurdîstanî nêzdî ra teqîb keno û 1996 de Şam de û 1999 de Roma de Abdullah Ocalan dîyo vat: ''Ocalano ke merdimêko ercîyaye yo 22 serrî yo tepişîyeno. no sûcêkê merdimîye yo.''

Prof. Norman Paechî bale ante betalkerdişê wekilîya Omer Faruk Gergerlîogluyî û dewaya qefilnayîşê HDPyî ser û vat: ''Nê hêrişê vera HDPyî bêçaretî û tengasîya Erdoganî nîşan kenê. Ez nêzanena çira Ewropa vera kerdişanê Erdoganî hende bêveng a. Ewropa krîteranê azadî, demokrasî û heqanê merdiman pê na bêvengîya xo binpay kena.''