Komîserê Komîsyonê Huqûqnasan ê Mîyanneteweyîyî û Profesorê Huqûqê Mîyanneteweyîyî yê Zanîngehê Cenevre Prof. Marco Sassoliyî  derheqê tecrîdê vera Rayberê Şarê Kurdî Abdullah Ocalanî de ANFyî rê qisey kerd.

Marco Sassoliyî bale ante şerê mabênê PKK û dewleta tirke û şarê kurdî ser û pare kerd ke Tirkîya nê şerî de goreyê Peymana Cenevre tênêgêrena. Sassoliyî vat: ''Goreyê na peymane ganî kesê ke nê şerî de cagênê û tepişîyenê wayîrê statuyê rehîneyanê şerî bibê. La Tirkîya de nê kesî bi îşkenceyî tepişîyenê û heqê înan yenê binpaykerdene.''

Sassoliyî îfade kerd ke tecrîdê Îmraliyî vera Peymana Heqanê Merdiman a Ewropa yo û vat: ''Seke Mehkemeya Heqanê Merdiman a Ewropa vana tecrîdê Îmraliyî binpaykerdişê heqanê merdiman o. Xora mehkeme verê cû tesbîtê winayênî zaf kerdbî. Rixmê ney zî Tirkîya tecrîd de israr kena ke endama Konseya Ewropa ya. Tirkîya multecîyan verê Ewropa de sey şantajî şuxilnena. Ewropa coka krîteranê xo binpay tecrîdî rê vengê xo nêkena. Naye ra Komîteya Wezîran a Konseya Ewropa mesuldara tecrîdî ya.

Tecrîdê Îmraliyî raşta raşte îşkence yo. Heqê Komîteya Vergirewtişê Îşkenceyî (CPT) est o ke şoro Zîndanê Îmraliyî. Verê cû zî CPT şibi Îmraliyî û tayê raporî amade kerdbî. Eke dewleta tirke qebul bikera CPT eşkeno nê raporan eşkera bikero. Sey qayîdeyî hewce yo ke pêro dewletî parekerdişê nê raporan tesdîq bikerê. La aseno ke Tirkîya qebul nêkerdo ke CPT raporan eşkera bikero.''