Mayanê Şemeyî 27ê gulana 1995î ra nata pê şîarê ''Vînbîyayeyî wa bêrê dîyene, faîlî wa bêrê hukmkerdene'' Meydanê Galatasarayî de çalakîya roniştişî kerdêne. Îqtîdarê AKP-MHPyî hewteyê 700. ra nata destûr nêdano ke Mayê Şemeyî Meydanê Galatasarayî de çalakîya xo bikerê. Mayanê Şemeyî pê wesîleya serrgêra xo ya 25. pê tewrbîyayîşê Sereka Şubeyê Îstanbulî yê ÎHDyî Gulserene Yolerî waşt ke Meydanê Galatasarayî de bêrê pêser la polîsan mayî asteng kerdî.

Mayanê Şemeyî serê bendanê polîsan ra qeranfîlî eştî meydanî û sloganê ''Ma do Galatasarayî ra fek vera nêdê'' û ''Ma do cigêrayîşê vînbîyayeyanê xo ra fek vera nêdê'' vatî.

Çalakîye de merdimanê vînbîyayeyan ra Masîde Ocak mesajê ''Ma do tira fek vera nêdê'' da. Birayê Ridvan Karakoço ke nezaret de dîya vînkerdene û goristanê bêkesan de meyîtê ci dîya, Hasan Karakoçî zî vat: ''Ma seba ke merdimî nêdîyê vînkerdene yenê tîya. Hezar serrî zî derbaz bibê ma do reyna bêrê tîya. No şermê welatî yo. Bi hezaran merdimî bi barbarî ameyî qetilkerdene. No şermê şima yo.''

Waya vînbîyaye Hayrettîn Erenî Îkbale Eren zî wina qisey kerd: ''Dadîyî tîya de gêrayî seba cenazayanê domananê xo. Nê merdimî nezaret de dîyayî vinkerdene. No sûc o. Ma faîlanê nê sûcî ra teqez hesab do bipersê. ''