Weçînayîşanê 31ê adare de Dem Partî qezaya Xelfetî ya Riha de ser kewte la weçînayîşê qeza ame betalkerdene. Dima bire dîyaye ke qeza de newe ra weçînayîş nêro kerdene û şaredarîye bidîya namzedanê DEM Partî.

Bire ra dima bi dîmenan eşkera bi ke qeyûmî nêmeyê şewe belge û eşyayê şaredarîye diznayê. Dîmenî hetê Wekîlê DEM Partî Omer Ocalanî ra ameyî vilakerdene. Rojêke dima Hemşaredaranê Xelfetî tesbît kerd ke qeyûmî sîstemê kamerayan zî diznayo.

Hemşaredara Xelfetî Sanîye Bayram ANFyî rê qalê babete kerd.

Sanîye Bayram îfade kerd ke sebebê betalkerdişê bira newekerdişî hûmara zêde ya rayanê înan bîya û vat: ''Xelfetî de xeylêk cayan de bi komkî rayî dîyayî, sindoqî ameyî vêşnayene la rixmê ney zî ma ser kewtî. Heyetê Weçînayîşî yê Berzî (YSK) rayanê ma yê zêdeyan ra mazbata daye ma. Axir peynî de edalet ame caardene. Şarê ma bi xurtî wayîrê ma vejîya. Heta ke ma mazbataya xo girewte şarî ma nêverdayî.''

Sanîye Bayram bale ante kerdişanê qeyûmê Xelfetî ser û vat: ''Qeyûmî bi 400 mîlyonan deynî şaredarîye teslîm kerde. Hema bêusûlîyanê qeyûmî ser o cigêrayîşê ma dewam kenê. Goreyê tesbîtanê ma şaredarîye de 200 personelî est ê la zafê nînan nêxebitîyenê, teyna meaşê xo gênê. Qeyûmî kamerayî tira kerdê, berdê. Ma gerreyê ney kerd. Ma do netîceyan cigêrayîşanê xo helbet şarê xo de pare bikerê. Ma do tim xizmetê şarê xo bikerê.''