Tepişteyanê sîyasîyan vera sîstemê zîndananê tîpê Fyî grevê vêşanîye yo bêdem dabi destpêkerdene. Grevê vêşanîye roja 45. de vurîya rojeyê mergî.

18ê kanûne de selahîyetdarê ê çaxî Serekwezîr Bulent Ecevît, Hetkarê Serekwezîrîye Husamettîn Ozkan, Wezîrê Edaletî Hîkmet Samî Turk û Wezîrê Karanê Zereyî Saadettîn Tantanî Serekwezîrîye de ameyî yewca.

19ê kanûna 2000î de pê bira koalîsyonê DSP, MHP û ANAPî  bi hawayêkê hemwextî binê nameyê 'Operasyonê Agêrayîşê Cuye' hêzanê asayîşê dewlete eşt 20 zîndanan ser.

Wezîrê Edaletî Hîkmet Samî Turkî operasyonî sey 'caardişê otorîteyê dewlete', Ecevîtî zî sey 'têkoşînê vera terorîstan' pênase kerdî.

Hêrişanê qirkeran 3 rojan dewam kerd û goreyê doneyanê dewlete 30 kesî ameyî qetilkerdene, 237 kesî birîndar bîyî, 2 leşkerê tirkî zî merdî.

Rojeyê mergî bi serran dewam kerd û netîceya ci de 90 kesan dinyaya xo bedilnaye û 500 kesî zî nêweşîya Wernicke-Korsakoffî ra vîrê înan çinbî. Nê hêrişan de çekê kîmyewî û bombayê giranê ke leşan helnayene şuxilîyayî.

Nê qirkerdişî ra dima dewlete tepişteyî dayî mehkeme û ê  serewedaritişî ra sûcdar kerdî. Mudiro pêroyî yê ê çaxî yê zîndanan û mîmarê sîstemê tîpê Fyî Alî Suat Ertosun hetê AKPyî ra ame xelatdayene.

Mehkemeya Heqanê Merdiman a Ewropa zî Tirkîya 'binpaykerdişê heqan û îşkence' ra hukm kerde.

Hemkara sûcî: Medyaya tirkan

Medyaya tirkan zî sûcê dewlete û Qirkerdişê 19ê kanûne kerd mîyan.

Rojnameyê Mîllîyetî îdîa kerd ke tepişteyî rojeyê mergî de nêbîyî û 'weş û war bîyî.'

Rojnameyê Hurrîyetî zî qirkerdişê dewleye mîyan kerd û îdîa kerd ke 'tepişteyan pê kalaşnîkofan hêrişê hêzan kerd.' Nuştoxanê faşîstan ê Hurrîyetî Emîn Çolaşan, Fatîh Altayli û Cuneyt Ulseverî bi hawayêkê eşkerayî perrê dewlete girewt û ê kesê ke paştî dayêne tepişteyan hedef kerdî.

Rojnameyê Sabahî zî sûcê dewlete kamufle kerd û pê zûran îfade kerd ke 'hêzê asayîşî bi hisgerî têgêrayî.' Rojnamegerê Sabahî Gungor Mengîyî zî îfade kerd ke 'dewlete hol o ke mudaxeleyê zîndanan kerd.'