Amed de Platformê Demokrasî û Kede Meydanê Dagkapiyî de derheqê Qirkedişê Parisî û hêrişê vera DBPyî de eşkerayîye daye. HDP, TJA, Meclîsê Dayîkanê Haştîye zî paştî daye eşkerayîye.

Eşkerayîye de pankartê ''Bêrê ma pêro pîya têkoşînê vera qirkerdiş û  qirkerdişê sîyasîyî gird bikerê'' ame akerdene û sloganê ''Kurdîstan do dişmenî rê bibo mezel'', ''in, jiyan, azadî'' û  ''Bijî berxwedana kurdan'' ameyî eştene.

Eşkerayîye de Wekîlê HDPyî yê Amedî Îmam Taşçierî qisey kerd. Taşçierî Qirkerdişê Parisî şermezar kerd û vat:  ''Paris de hêrişê vera komele û esnafanê kurdan de hîrê kesî ameyî qetilkerdene. Des serrî verî zî tîya hîrê kurdî ameybî qetilkerdene. Coka ganî her cayê Kurdîstanî de şarê ma wurzo payan ser. Ma çend bêveng bimanê nê hêrişî zêdîyenê. Nê wazenê kurdkî bêro qalkerdene û kurdî wayîrê heqanê xo vejîyê. Hêrişê Parisî vera sîyasetê demokratîkî yo. Wa her kes wurzo payan ser û nê teşhîr bikero. Ma çok nêdanê.''

Eşkerayîye de ame vatene ke aktîvîstê kurdê ke zextê dewlete ra remayî şîyî Ewropa ewro tîya yenê qetilkerdene ke no qirkerdişo sîyasîyî yo. Eşkerayîye de bale ameye antene serê polîtîkaya hêrişkarê ya vera sîyasetmedaranê kurdan ser û veng dîya rayapêroyîye ke wa vera qirkerdişanê sîyasîyan û zextan vengê xo berz bikero.

Reyna Colemêrg, Wan, Êlih û xeylêk bajaranê bînan de zî Qirkerdişê Parisî û operasyonê vera DPByî ameyî şermezarkerdene û mesajê xurtkerdişê têkoşînî ameyî dayene.