Polîsanê tirkan eşt Merkezê Pêroyî yê Partîya Demokratîke ya Herêman (DBP) û Baroyê Paştdayîşî yê Amedî ser. Bînayan de cigêrayîşî dewam kenê.

Polîsan eşt keyeyê Hemserekê Pêroyî yê DBPyî Keskîn Bayindirî ser. Polîsanê ke keye serûbin kerd Hemserekê Pêroyî Bayindir destbend kerd. Bayindir ame berdene Mudirîya Polîsan a Amedî.

Wekîlê HDPyî Ebru Günay, Merale Danış Beştaş, Dersime Dag, Remziye Tosun, İmam Taşçıer û Feleknase Uca şîyî Buroyê Paştdayîşî yê Merkezê Pêroyî yê DBPyî. Hemserekê HDPyî yê Amedî Zeyyat Ceylan û Gulîstane Atasoy zî verê bînaya ke tede cigêrayîş dewam keno de pawenê.

Pîya bi bînaya Merkezê Pêroyî ya DBPyî  Mêrdîn, Şirnex, Wan, Êlih, Dîlok  û xeylêk bajaranê bînan de zî bînayê partî ameyî sereştene. Sereştişan de berê bînayan ameyî şiktene.

Goreyê zanayîşanê ke ameyî destfînayene Hemserekê partîye yê Şirnex Zekî Îrmez, Hemserekê Wanî Şengul Polat û Harun Okay, Hemserekê Riha Hîdayet Endek, Hemserekê Dîlokî Ethem Unal û Zelîha Aslan, Hemserekê Mêrdînî Şerefettîn Aslan ameyî destbendkerdene.

Yeno vatene ke kesê ke çarçeweya cipersayîşê Serdozgerîya Komere ya Amedî de ameyî destbendkerdene hûmara înan dahîna zaf a. Sîyasetmedarê ke ameyî destbendkerdene do  pêro bêrê ardene Amed.