No hewte cinîyan ê enternasyonalîstan Nobeta Azadîye dewr girewte. Aktîvîstan pare kerd ke seba ke paradîgmaya Rayber Apoyî bikewa dewre ganî her kes têbigêro û vat: ‘’Wa her kes tewrê nê xoverdayîşî bibo.’’
Hewteyê 682inî de cinîyan ê enternasyonalîstan Nobeta Azadîye ya Strasbourgî dewr girewte.
Kome de Nele Mohlmann, Petra Onnen, Rebecca Alpers û Lilli Gruber cagênê ke nê cinîyê aktîvîstî beşdaranê kampanyaya ‘’Women Defend Rojava’’ ra yê zî.
Ma semedê azadîye tîya de yê
Nameyê kome ser o Lilli Gruber ard ziwan ke ê wazenê ke paştî bidê xîretanê seba azadîya Rayber Apoyî û vat: ‘’Ma semedê azadîye tîya de yê. Fikrê Abdullah Ocalanî seba azadîya pêro cinîyan girîng ê. Sey ey camêrdêko bîn çin o ke hendê seba heqanê cinîyan têkoşîn keno.’’
Mehmet Çakasî rê azadîye!
Petra Onnen bale ante ser ke Almanya kena ke aktîvîstê kurdî Mehmet Çakasî sînorî ra teber bikera û teslîmê Tirkîya bikera. Petra vat: ‘’Dozgerîya Federale kena ke Çakasî bişawa Tirkîya. No skandal o. Dewleta Almanya goreyê qanûnan tênêgêrena. Eke Çakas teslîmê Tirkîya bêro kerdene ‘endamîya PKKyî’ ra bi hawayêkê edîlî do nêro muhakemekerdene. Ma venga pêro kesan danê ke seba haştîye û edaletî têkoşîn bikerê. Mehmet Çakasî rê azadîye!’’
Ganî ma wurzê payan ser
Rebecca zî vist vîrî ke fikrê Rayber Apoyî seba pêro şaranê dinya alternatîf ê û paradîgmaya Modernîteya Demokratîke eşkena şaran bixelisna. Rebecca vat: ‘’Ganî ma wurzê payan ser, nê fikran bîyarê ca. Wa pêro cinî û ciwanê dinya seba azadîya Ocalanî tewrê nê xoverdayîşî bibê. Ma eşkenê pîya ey azad bikerê û dinya teda ra bixelisnê.’’
