Çarçewa Hemleya ‘Haştîye û Komelê Demokratîkî’ de vizêr Rayber Apoyî mesajêkê bi vîdeoyî erşawitibi. Roniştoxanê Amedî yê ke 26 serran ra dima mesajê vîdeoyî yê Rayber Apoyî temaşe kerdo, ajansê ma rê qalê hîsanê xo kerd.

Selahattîn Erî dîyar kerd ke înan şahîdîya helêka tarîxîye kerda û vat: ‘’Felata Rojhelatê Mîyanênî paradîgmaya Rayber Apoyî de ya. Rayber Apoyî 1993 de zî heman çi vatibi. Şarê kurdî zî Rayberê xo ra bawer o. Wa no zulm biqedo. Şarê ma bi serran o hesreta veng û rîyê Rayber Apoyî bi. Heta ke o azad nêbo Rojhelato Mîyanên zî azad nêbeno. Ma hinî şer û mergî nêwazenê.’’

Mecît Tûrgayî vat: ‘’Dima ke mi vengê Rayber Apoyî eşnawit ez bi kelecan bîya. Sey kurdîstanijêkî raşta zî ez kêfweş a. Hêsîrî kewtê çimanê mi. Ganî her kes qîmetê nê helanê tarîxîyan bizano. Rayber Apo sey Hz Nuh keno ke şarê xo bipawo. Ganî hinî dewleta tirke gamanê samîmîyan bierza.’’

Mehmet Şenerî vat: ‘’Ê bi prosesê haştîye hêvîdar ê. Ma pê bawer ê ke çîyê başî do bibê. Ma wazenê ke no prosesê şerî biqedo. Ganî cade gamê qanûnî bierzîyê.’’

Bûrak Bektaşî vat: ‘’Ma mesajê Birêz Ocalanî bi kelecanî pêşwazî kerd. Seba ma pêroyînan bi moral ke ma vengê ey eşnawit. Ma hinî nê erdî de haştîye wazenê. Ganî dewlete game bierza.’’