Qurbanê Qirkerdişê 5ê Hezîrana 2015î yê ke hêrişê vera mîtîngê HDPyî de ameybî qetilkerdene bi rayraşîyayîşêkî ameyî yadkerdene. Rayraşîyayîş de xoverdayîşê Colemêrgî ame selamkerdene û darbeya qeyûmî ameye protestokerdene.
5ê hezîrana 2015î de mîtîngê HDPyî yê Meydanê Îstasyonî yê Amedî de DAÎŞî bomba teqnabî. Rixmo ke war de 2 hezar û 360 polîsî est bîyê DAÎŞî no qirkerdiş kerdbi. Şehîdê qirkerdişî bi rayraşîyayîşêkê bi meşaleyan ameyî yadkerdene.
Rayraşîyayîş serkêşîya DEM Partî de ame kerdene. Hetkarê Hemserekanê DBPyî Tarik Tatli, Wekîlê DEM Partî Sînan Çîftyurek û Ceylane Akça û xeylêk kesî tewrê rayraşîyayîşî bîyî.
Girse bi slogananê sey ''Amed, Pirsûs, Anqara; xo vîr a mekerê'', ''Colemêrg ê ma yo, şaredarîye yê ma ya'' heta Meydanê Îstasyonî şi. Meydan de Hemserekê DEM Partî yê Amedî Abbas Şahînî pare kerd ke ê do nê qirkerdişî nêdê vîrakerdene.
Wekîl Sînan Çîftyurekî zî vat: ''Tarîxê Tirkîya tarîxê qirkerdişan o.''
Wekîle Ceylane Akça vera mudirê polîsan o ke waştêne qiseykerdişan bi megafonan asteng bikero nêrazîbîyayîşê xo mojna û vat: ''Organîzatorê DAÎŞî yo ke Qirkerdişê Anqara kerd 40 reyî şibi MÎTî. Wexto ke keyeyî dejê xo pare kenê şima megafonan vejenê.''
