Herêma Kutudere ya Dêrsimî de bi merasîmêkî qurbanê Terteleyê 38î bi wesîleya serrgêra terteleyî ameyî yadkerdene. Hemsereka DEM Partî Tulaye Hatîmogullari zî tewra yadkerdişî bîye. Yadkerdişî bi tavistişê çeraxan û rêzgirewtişî dest pêkerd.

Hemsereka Pêroyî ya Komeleya Demokratîke ya Elewîyan (DAD) Kadrîye Dogan pare kerd ke dêrsimijî 4ê gulane sey 'Roja Reş' pênase kenê û vat: ''Ma armanc kenê ke nê qirkerdişî nêdê vîrakerdene.''

Serekê Federasyonê Yewîya Eleîyan ê Almanya Huseyîn Matî îfade kerd ke ê seba ke Terteleyê Dêrsimî sey jenosîdêkî bidê qebulkerdene, Ewropa de xebitîyenê. Matî vat: ''Dewlete herinda ke hesabê qirkerdişî bipersa, polîtîkayanê înkar û îmha rê dewam kena.''

Hemserekê DADî Zeynel Keteyî vat: ''Dêrsim de pêro gandarî o çax raştê terteleyî ameyî. Rayîrê qurbananê terteleyî rayîrê ma yo. Ma do înan qetî xo vîr a nêkerê.''

Tulaye Hatîmogullari vat: ''Ma qirkerdişê Dêrsimî qetî xo vîr a nêkerê. Heta ke elewî û kurdî bi qanûnan bibê hemwelatîyê têdûştî û zulmî ra bixelisê ma do têkoşînê xo rê dewam bikerê. Ganî dewlete nê qirkerdişî de têrî bêra û uzrê xo biwaza.''

Qiseykerdişan ra dima girseyî Çemê Munzurî ser de qeranfîlî verdayî.