Komeleya Huqûqnasan a Seba Azadîye (OHD) ya Amedî û Komeleya Paştdayîşê Keyeyanê Tepişteyan (TUAY-DER) derheqê binpaykerdişê heqan ê tepişteyanê ke Zîndanê Qefilnayeyî yê Tîpê Tyî yê Oltu yê Erzirom û Zîndanê Qefilnayeyî yê Tîpê Tyî yê Erzîganî de raporî amede kerdî.

Erzirom: Raporo ke muracatê merdimanê tepişteyan ser badê zîyaretê zîndanî ame amadekerdene de derheqê binpaykerdişanê menga adare yê Zîndanê Erziromî de nê ameyî vatene: ''Şertê hîjyenîkî çîn ê rixmê janî  odayî nînê dezenfektekerdene.  Sewqê nêweşaxaneyan nînê kerdene. Hûmara kitaban ameya wardayene, tepişteyî têna eşkenê hewt kitaban cayê xo peyda bikerê. Rojnameyê Yenî Yaşam û Evrenselî nînê dayene. Tepişteyê ke grevê vêşanîye de cezaya disîplînî dîyena înan.''

Erzîngan: ''Raporê Zîndanê Erzîganî yo ke menga adare de pêvînayîşê tepişteyan û îdareyê zîndanî ser o ame amadekerdene ra tay cayî wina yê: Cayê hewadayîşî zaf qij ê. Nêweşî sewqê nêweşxaneyen nêbenê. Aktîvîteyê sosyalî nînê kerdene. Kargoyî zaf erey dîyenê tepişteyan. Mektubê kurdkî yenê destsernayene û vervejîyayîşî bênetîce manenê. Tepişteyê ke seba ke keyeyanê xo ra nêzdî bê sewqê xo wazenê waştişê înan yeno redkerene. Pêvînayîşanê akerdeyan de destûr nêdîyeno ke selam bîdiyo keyeyanê bînan. Tepişteyê ke kewtê grevê vêşanîye derheqê înan de bi îdîya 'endamîya rêxisitine' dewayî ameyî akerdene. Hûmara kitabanê ke tepişteyê eşkenê cayê do vidnarnê bîye 5. Cigêrayîşê koguşan zaf lez yenê kerdene û odayî yenê serûbinkerdene.''

Raporan de ame vengdayene ke wa nêweşê giranî û êyê ke grûba rîske de yê cade bêrê verdayene û tedbîrê vera janî wa bêrê xurkerdene. Reyna vera binpaykerdişê heqanê ke ciwîyene veng dîya Wezîrîya Edaletî û Komîsyonê Cigêrayîşê Heqan Meclîsî ke wa wezîfeyê xo bîyarê ca.