Akademîya Komelkîyan a Abdullah Ocalanî û Înîsîyatîfê Abdullah Ocalanî rê Azadîye yê Ereban bi wesîleya rojbîyayîşê Rayberê Şarê Kurdî Abdullah Ocalanî sempozyumêkê Zoomî kerd.

Dekano verên ê Fakulteya Huneran a Zanîngehê Damanhourî Prof. Dr. Mihemed Rifat El Îmam, Hemserekê Zanîngehê Kobanê Şervan Muslim, Koordînatorê Înîsîyatê Abdullah Ocalanî rê Azadîye Dr. Îlhamî el Melîgî zî tewrê sempozyumî bîyî.

Avûkatanê Rayberê Şarê Kurdî ra Mazlûm Dînçî vist vîrî ke destûr nêdîyeno ke Ocalan keye û avûkatanê xo bivîno. Dînçî da zanayene ke tecrîdê Îmraliyî dûştê qanûnanê neteweyî û mîyanneteweyîyan o.''

Zanyarê sîyasetî Dr. Taha Alîyî ard ziwan ke fikrê Ocalanî pêro dinya rê tesîr kenê û vat: ''Rayber Ocalanî vera sîstemo ke cinîyî kerdêne kole sîstemê konfederalîzmê demokratîkî awan kerd û cinî û komel kerdî merkez.''

Nuştox Îlhamî El Melîgîyî vat: ''Mîyanê ereban de têkoşînê seba azadîya Abdullah Ocalanî beno pîlêr. Ma nika kenê ke derheqê Ocalanî de kitabêkî amade bikerê.''

Dr. Sahare Ehmed vat: ''Abdullah Ocalanî statuyê cinîyan vurna û cinîyî kerdî mefteyê cuye. Abdullah Ocalanî azadîya cinîyan sey azadîya Kurdîstanî dîye. PKK zî ronîyayîşê xo ra nata seba azadîya cinîyan têkoşîn keno.''

Prof. Dr. Mihemed Rifet El Îmamî vat: ''Abdullah Ocalanî sey Mandelayî vera kolonyalîzmî têkoşîn kerd.''

Prof. Dr. Sîfan Seîdî vat: ''Rayber Apoyî bi têkoşînê xo komel vurna. Şarê kurdî yo ke ameyêne qirkerdene nika seba cuyêka rûmetêne û azade têkoşîn keno.''

Şervan Muslimî zî dîyar kerd ke fikranê Abdullah Ocalanî cuyê kurdan vurnayê.

Dr. Hîkmet Abdulkerîmî venga pêro kesan da ke seba azadîya Ocalanî destê înan ra çi bêro bikerê.

Avûkat Ehmed Recebî zî bale ante ser ke ganî huqûqnas û dezgehê huqûqî seba azadîya Ocalanî tedaya dewleta tirke bikerê.