Muxtarê dewa Meydanî ya qezaya Xinisî ya Erziromî Gazî Aydinî medyaya komelkîye de pê vilakerdişanê xo bale ante ser ke rayîrê dewa înan nêvirazîyenê. Rayîrê dewa Meydanî heman wextî pabesteyê rayîranê 10-12 dewanê elewîyan ê. Bi serran o ke vengdayîşanê dewijan rê cewab nêdîyeno. Dewijî bi taybetî zimistanan de zaf zehmetîye ancenê.

Serekê dezgehanê elewîyan zî tim anê ziwan ke vera elewîyan cîyakerîye yena kerdene û dewanê înan rê xizmet nêno kerdene.

Ambulanso ke ameyêne dewe şi binê çamurî. Muxtarê dewa Meydanî ya qezaya Xinisî ya Erziromî Gazî Aydinî nê serebûtî ra dima medyaya komelkî de venga îqtîdarî da ke rayîrê înan bivirazo. Aydinî da zanayene ke çamurê rayîran ra nêweşan rê cade mudaxele nêno kerdene.