Ciwanan vera tecrîdê Îmraliyî yo ke kewno serra 25. ruhê sferberîye îlan kerd û veng da ciwananê kurdan ê ke Ewropa de ciwîyenê. Naye ser o welatanê sey Almanya, Swîsre, Fransa, Îngîlîstan,Îspanya, Îtalya, Blîvya ra nizdê 40 ciwanê enternasyonalîstî û 200 ra zafêr kurdîstanijî tewrê 'Rayraşîyayîşê Azadîye' bîyî.

Bi seyan ciwanê ke Merkezê Komelê Demokratîkî yê Kurdan ê Dortmundî de ameyî têhet bi şîarê  'Ciwananê rêxistinbîyayeyan reyde ver bi azadîya Rayberîye'  derheqê fîkranê Abdullah Ocalanî de tay konferansî kerdî.

Roja verên a rayraşîyayîşî de do Dortmunî ra heta Bochumî rayraşîyayîş bêro kerdene. Ciwanê ke saetanê serê sibayî de îstasyonê trenan ê Dortmundî de ameyî têhet, bi sloganan gonvende girewte û badê eşkerayîya çapemenîye dest pê rayraşîyayîşî kerd.

Eşkerayîya ciwanan de nê ameyî vatene:

''Ma do sey ciwananê kurdan û enternasyonalîstan bibê yew;vera kapîtalîzm û faşîzmî xover bidê û ser bikewê. Ma do seba ke Rayber Apoyî reyde bibê azad, têkoşînê xo bidomnê. 30 aşmî yo ka Rayber Apoyî ra xebere nîna girewtene. Ma zaf qesawet kenê. Ma do semedê azadîya fîzîkîye ya Rayber Apoyî  tim têkoşîn bikerê. 25 serrî yo Rayber Apo binê tecrîdê giranî de yo. Bi cezayanê dîsîplînî verê pêvînayîşanê ci yeno girewtene. Nêeşkeno merdiman û avûkatanê xo bivîno. Ganî heme merdimîye vera nê îşkenceyî vengê xo berz bikero. Na çarçewe de ma venê ke bêrê tewrê Rayraşîyayîşê Azadîye bibê. Rayraşîyayîşê ma do Dortmundî ra heta Kolnî dewam bikero. Ma veng danê ciwanan ke wa wayîrê çalakîya ma bivejîyê.''

Ciwanî do roja 2. de Bochumî ra heta Essenî, roja 3. de Oberhausenî ra heta Duisburgî, roja 4. De Neussî ra heta Dusseldorfî rayra şirê. Roja 5. de , 8ê êlule de do Kolnî ra hetê merkezê Mulheimî rayra şirê û tîya rayraşîyayîşê xo biqedînê.