'Rayraşîyayîşê Îradeyî rê Hurmet'î yo ke DEM Partî vera destsernayîşê Şaredarîya Colemêrgî da desptêkerdene, roja 7ine de dewam keno.

Hemserekê Pêroyî yê DBPyî Keskin Bayindir, parlamenter, hemşaredar û temsîlkarê rêxistina komelê sîvîlî zî tede 350 kesê ke çalakîye de ca genê,şewe Elbakê Wanî mendî. Raywanê ke saetanê rewî yê serê sibayî de ameyî têhet merkezê qeza ra ver bi Colemêrgî kewtî rayîr. Çalakwanê ke bi slogananê “Jin, jiyan, azadî”, “Colemêrg ya me ye”, “Bijî berxwedana zindanan” rayra şîyî bado ke çar kîlometre rayra şîyî, eşkerayîye daye.

Sereka Pêroyî ya SYKPî Feraye Mertoglu eşkerayîye daye ard ziwan ke ê rixmê heme astengkerdiş û zehmetîyan rayraşîyayîşî rê dewam kenê û vat: ''Îqtîdarê AKP-MHPyî vera kurdan û şaran polîtîkaya zulmî ano ca. Îqtîdar seba ke payra bimano destûr nêdano kurdî xo bi xo îdare bikerî. Seba ke meseleya kurdan bi rayîrê demokratîkî nîna çareserkerdene ewro qeyûmî yenê cakerdene. Ganî heme rayapêroyî, şorişgêrî, muxalefetê burjuva zî tede her kes vera nê vengê xo berz bikero. Eke ma bêveng bimanê, cinîyî keye de yenê hepskerdene, karkerî bêkar manenê û xoza yena texrîbkerdene. Coka ganî her kes wayîrê nê rayraşîyayîşî bivejîyo.  No eynî wextî de rayraşîyayîşê azadîye yo. Vera na bêhuqûqîye û neheqîye ganî her kes vengê xo berz bikero.''

Badê eşkerayîye raywanan ver bi sînorê Colemêrgî rayraşîyayîşê xo rê dewam kerd.