Ciwananê kurdan semedê azadîya fîzîkîye ya Raybarê Şarê Kurdî Abdullah Ocalanî Rayraşîyayîşo Dergo ke her serre sey tradîsyonkî kenê bajarê Sierentzî yê Fransa de da destpêkerdene.

Rayraşîyayîşo ke 11ê sibate de Strasbourg de  do bigedîyo  xeylêk welatanê Erwopa ra ciwanî tewrê ci benê. Verê rayraşîyayîşî semedê Şehîde Berjîne Zenda û heme şehîdanê Kurdîstanî rêz ame girewtene. Çekdar Serhadî ke bi nameyê TCŞyî qisey kerd bale ante tecrîdê  23 serran ê serê Raybarê Şarê Kurdî Abdullah Ocalanî ser û vat: ''Ma do heta azadkerdişê Abdullah Ocalanî tim kuçeyan de bê. Kurdîstan de vera kurdan çekê kîmyewîyî yenê şuxulnayene. Ganî NATO verê rotişê çekanê bigêro. Ma do sey ciwananê kurdan wayîrê têkoşînê gerîlayan vejîyê û vera heme zextan û komployan tim payan ser bê.''

Rayraşîyayîş ewro do mabênê bajaranê Sierentz û Colmarî de bêro kerdene. Ciwanî do 20 km rayra şirê.