Raywanê Rayraşîyayîşê Azadîye yê Pîlî yo ke Wan de amebi destpêkerdene resayî Qoserê Mêrdînî. Raywanê Azadîye bi slogananê "Bîjî Serok Apo”, “Bîjî berxwedana zindanan”, “Jin jiyan azadî” û def û zûrna û erbaneyan ameyî pêşwazîkerdene.

Dima ra rayraşîyayîş ame kerdene ke hewtî ra heta hewtayî her kes tewrê ci bi. Cinîyan bi kincanê xo yê neteweyîyan reng da rayraşîyayîşî. Rayraşîyayîş bi deyîran û sloganan ame kerdene. Derûdorî ra û esnafan bi çapikan û sloganan Raywanê Azadîye selam kerdî.

Raywananê azadîye serê rayîrê ke nameyê ey dîyayo ci de Ugur Kaymaz yad kerd ke bi 13 guleyan amebi qetilkerdene.

Meydanê Azadîye de Heserekê Pêroyî yê DBPyî Kesin Bayindirî xîtabê şarî kerd. Bayindirî nê vatî: ''Ma bi seserran o ke hesretê azadîye ancenê. Ma bi nê hesretî dest pê rayraşîyayîşî kerd û heta serkewtişî do rayraşîyayîşê ma dewam bikero. Serê Birêz Ocalanî de tecrîdê giran est o. Ma hetê nika verê nê tecrîdî de milê xo çewt nêkerd ma do ewro ra tepîya zî milê xo çewt mekerê. Ma wazenê ke wa meseleya kurdan bi muxatabê ci cade bêro çareserkerdene. Muxatab zî Birêz Abdullah Ocalan o. Na tena meseleya dayîkan, meseleya ma nîya, meseleya her kesî ya. Eke Tirkîya de cuyeyêka seyyewbîne yena ciwîyayene ganî na mesele bi muxatabê ci bêro çareserkerdene. Coka ma serkêşîya nê rayraşîyayîşî girewtê xo ser. Bêrê ma sey mîlyonan cuye azad û seyyewbîne înşa bikerê. Ma do heta serkewtişî têkoşînî rê dewam bikerê.

Dima ra namzedanê hemşaredarîya Qoserî yê Hamdiye Turgay û Zeynî Îpekî qisey kerd.