'Rayraşîyayîşê Îradeyî rê Hurmet'î yo ke DEM Partî vera destsernayîşê Şaredarîya Colemêrgî da desptêkerdene, roja 7ine de dewam kerd. Raywanî resayî Gelîya Zapî. Koma Cinîyan ê Femînîstan û Heyetê Colemêrgî Pirdê Ciwananê Şorişgeran de şîyî vera raywanan. Tîya sloganê sey “Bijî berxwedana Colemêrg”, “Bijî berxwedana zindanan” ameyî vatene.

Hemserekanê DEM Partî yê Bajarî Gulşene Kurd û Kadir Şahinî şarî spas kerd û vat ê do vera xespkerdişê îradeyî têkoşînî rê dewam bikerê.

Parlamentera DEM Partî Çiçeke Otlu zî vat: ''Deniz Gezmiş û embazê ci semedê wayûbiratîya kurdan, semedê têkoşînê Sakînayen ameybî. O wext pirdê Bogaziçi ameyêne viraştene. Denizan zî vera nê tîya pirdê wayûbiratîye viraşt. Denîzî ameyî tîya ke wa kurdî merê qetilkerdene, merê çînbîyayêne.  Nika wextê ci yo ke pêro Tirkîya bibo Deniz. Ma do bi nê têkoşînî ke ma Denizan ra girewto, vera faşîzmî vinderê. Wa biciwîyo wayûbiratîya şaran.''

Parlamenterê DEM Partî Mehmet Zeki Irmezî zî vat: ''Di reyî îradeyê ma ame xespkerdene. Raya hîrêyina ke eynî metodî şuxilnenê. Ma do vera nê xover bidê. Seserrî yo îradeyê kurdan yeno çîn hesibnayene. Meseleya kurdan wina nîna çareserkerdene. Serekko mar vano o do Esadî reyde pêvînayîş bikero la çareserîye Îmrali de ya. Ê se kenê wa bikerî do meeşkê îradeyê şarî bişiknê.''

Raywanê ke rixmê germayîya Gelîya Zapî bi hewayêkê qerardarî rayraşîyayîşê xo rê dewam kerd û slogananê  “Bijî berxwedana Colemêrg”, “Bijî berxwedana zindanan” resayî Erzinkê ke do şewe tîya bimanê. Raywanan tîya bi muzîkî govende girewte.