Rayraşîyayîşê Azadîye yo Pîl ewro roja 14ine de do bireso dewa Rayberê Şarê Kurdî Abdullah Ocalanî Amara. Wekîla DEM Partî Necla Demîra  ke beşdaranê rayraşîyayîşî ra  yew a, derheqê babete de ANFyî rê qisey kerd.

Necla Demîr vist vîrî ke baskêka rayraşîyayîşî 37 kesan ra, baska bîne zî 38 kesan ra ameya pê û vat: ''Ma sey 75 kesan seba xatirê 75 serrîya Birêz Ocalanî dest pê nê rayraşîyayîşî kerd. Rayraşîyayîşê ma 14 rojî yo bi coş û kelecanî dewam keno. Her ca de şarî moral da ma. Amed de girseyêkê pîlî ma pêşwazî kerdî. Rixmê teda û qedexeyê walîtî û asayîşî zî ma bi qerardarî rayraşîyayîşê xo kerd. Ma do Amara de zî rayraşîyayîşê xo biqedînê.

Nê rayraşîyayîşî seba şiknayîşê tecrîdî gamêka pîle eşte. Polîtîkaya 100 serran a Tirkîya ke qirkerdişê sûr û sipîyî est ê. Mîyanê nê des serran de zî qirkerdişê sipîyî zêdîyayî. Seba ke no qirkerdiş biqedo ganî hêverî tecrîd bêro wedaritene. Ekonomî ra heta cuya kulturele rewşêka nedîyare est a. Na zî bena sebebê bêhêvîtî û bêçaretîye. Pêro krîzî rîyê tecrîdî ra qewimîyenê.''

Necla Demîr îfade kerd ke ganî tecrîd wedarîyo û vat: ''Wedaritişê tecrîdî seba cinîyan zaf girîng o. Nê rayraşîyayîşî de hîrê armancê ma yê bingeyînî est ê; şiknayîşê tecrîdî, afernayîşê şeranê azadîya Birêz Ocalanî û afernayîşê dîyaloganê seba çareserîya meseleya kurdan. Nika rayraşîyayîşê ma her ca de vurîyayo çalakîyêka pîke. Destpêk de zîndanan de grevê vêşanîye dîya destpêkerdene, dima dadîyan dest pê Nobeta Edaletî kerd û ma zî no rayraşîyayîş da destpêkerdene. Heta ke çalakîyê ma bi serkewtişî tacîdar bibê têkoşîn û xoverdayîşê ma do dewam bikerê.''