13ê hezîrane de vera destsernayîşê Şaredarîya Colemêrgî şaristan de mîtîngêko pîl do bêro kerdene. Mîtîng do meydanê otogarî de bêro kerdene. Amadekarîyê mîtîngî dewam kenê.

Vera destsernayîşê Şaredarîya Colemêrgî xeylêk şaristananê sey Îstanbul, Anqara û Îzmîrî ra merdimî ver bi Colemêrgî kewtî rayîr.

Qezayanê Beyoglu, Kadikoy û Yenîbosna yê Îstanbulî de merdiman serê sibayî verê xo da otobusanê Colemêrgî. Girseyî verê bînaya DEM Partî de kom bîyî û înan sloganê sey 'Bijî berxwedana Colemêrgê', 'Colemêrg a me ye' vatî. 

Anqara de zî merdimî Parka Kurtuluşî de kom bîyî û kewtî rayîr. Endamê DEM Partî Zekî Korkmazî dîyar kerd ke sey kurdanê Anatoliaya Mîyanêne ê şarê Colemêrgî reyde yê û nê zulmî qetî qebul nêkenê.

Îzmîr de şar serê sibayî verê bînaya Rêxistina Îzmîrî ya DEM Partî de kom bi û kewt rayîr. Mîyanê nê kesan de kênaya Musa Anterî Rehşane Anter zî est a. Antere vat: ''Ma seba cananê xo şinê. Eke ma yew nêbê do nêeşkê ser bikewê.''

Îdarekaranê DEM Partî yê Îzmîrî ra Tuhtane Ulug zî vat ke ê do vera destsernayîşî xo ver bidê û şarê Colemêrgî teyna nêverdê.