Zîndananê Tirkîya de binpaykerdişê vera tepişteyan bi hawayêkê giranî dewam kenê. Nê tepişteyan ra yew zî Rûkene Yildiz a ke sewqê Zîndanê Îdirî ameya kerdene. Yildiza 27 serre de nêweşîyê qelb û tansîyonê berzî estê û bi mengan o hucreyê yewkesî de tepişîyena.

Kekê Rûkene Ferhat Yildizî û dadîya aye Hatîce Yildiz ANFyî rê qisey kerd û pare kerd ke tecrîd rewşa weşîya Rûkene kena giranêr.

Ferhat Yildizî îfade kerd ke Rûkene 2017 de wexto ke endama HDPyî bîye pê îdîayanê îtîrafkerî tepişîyaye û cezaya zîndanî ya muebede dîyaye înan. Ferhat Yildizî vat: ''Rûkene de verî meseleyê weşîye çin bîyî. La rîyê bêhuqûqîye ra roje bi roje nêweş kewte. Dima ke aye de nêweşîya qelbî vejîyaye tansîyonê ci berz bi. Zîndanê Wanî de nişka ra tansîyonê ci berz bîyo. Dezgehê Tipê Edlîyî yê Îstanbulî ci rê 'eşkena zîndan de bimana' dayo. 7 mengî verî zî nişka ra a sewqê Zîndanê Îdirî ameye kerdene.''

Ferhat Yildizî vist vîrî ke waya ci hucreyê yewkesî de yena tecrîdkerdene û vat: ''Wahya mi Tîpê Syî de ya. Nê tîpê zîndanî de tepişteyê nêweşî hucreyê yewkesî de yenê cakerdene. Waya mi pêvînayîşê ma yê peyênî de vat ke tansîyonê ci nişka ra beno berz, tecrîd rewşa ci giranêr kena û wazena Tîpê Syî ra sewqê tîpêkê bînî biba. Ganî cezaya waya mi û yê pêro tepişteyanê nêweşan bêra taloqkerdene.''

Dadîya Rûkene Hatîce Yildiz ard ziwan ke nêweşîya xo ra a nêeşkena şora kênaya xo bivîna û vat: ''Kênaya mi bêgune bîye la erzîyaye zîndanî. Nika uca de rewşa ci vera bena giranêr. Wa kênaya mi bêra veradayene. Ma do keye de miqatê ci bibê. Sûcê aye çin o, aye kes nêkişto, dizdîye nêkerda.''