Komîsyonê Zîndanan ê Komeleya Heqanê Merdiman (ÎHD) ya Îstanbulî bi eşkerayîyêke bale ante rewşa weşîye ya tepişte Kadrîye Cengîz ser.

Hemsereka ÎHDyî ya Îstanbulî Gulserene Yolerî îfade kerd ke binpaykerdişê heqanê tepişteyan dewam kenê û vat: ''Zîndanan de seba ke tedbîr nêno girewtene vera Korona vila bena û tepişteyî mirenê.''

Yolerî ard ziwan ke tepişteya Zîndanê Êlihî Kadrîye Cengîz 6 serran ra nata tepişte ya û 2 rey zîndan de gonîya ci ya mîde rijîyaye, tede kanserê pişike esto û 2 rey zî krîzê qelbî derbaz kerd.

Yolerî fekê kênaya Kadrîye Evîne Cengîz ra nê agahîyî pare kerdî: ''3 rey Kadrîye Cengîz karantîna de vera dîyaye û rewşa ci bîya xirabêre. Doktorî vanê ke hînî şexsê ci çin o. Ganî Kadrîye Cengîz cade bêra veradayene.''

Reyna Endama Heyetê Rayberdişî yê ÎHDyî Nuraye Çevîrmen Anqara de seba tepişteyê Zîndanê Odemîşî Mehmet Salîh Fîlîzî  eşkerayîyêke daye.

Çevîrmene eşkera kerd ke rixmo ke Fîlîz de nêweşîya kanserî ameye tesbîtkerdene dermanê ci nêdîyayî û goreyê dîyetê ci nan nêdîyeno ey. Çevîrmene pê hesna ke Fîlîz de nêweşîyê paştî, nefes û roqlayan zî estê û zîndan de nêeşkeno bimano. Çevîrmene venga selahîyetdaran da ke cade Fîlîz bêro veradayene.